«Чик хаалһ җирһлдм заалат...»

29-11-2025, 13:51 | ---

Көрстә һазр деер күн болһна төлә хамгин эңкр, хәәртә эк болдг. Унтл уга үрән хәләһәд, алтн уурган көкүләд, үрнәннь түрүн ишкдлинь үзҗ, түрүн үгмүдинь соңсч, җирһлин туршарт эк маднд нарн мет мандлна. «Альхн деерән мах чанв чигн экин ачиг хәрүлҗ болшго» гиҗ келдг.
Бичкнәсн авн эк болһн үрнәннь төлә үлгүр болна. Көтчнрә района Шатта селәнд олн үртә бүлд өсәд-боссн Саглр Манджеева эндр дөрвн үрндән үлгүр болна. Һурвн күүкән болн көвүһән өвкнрин авъясар өскчәнә. Ууһн Дима көвүнь Т.Хахлынован нертә медицинск колледж төгсәһәд, одахн цергәс бууҗ ирв. Алтн Герл күүкнь эн җил Москван ФСБ-н академин оютн болв. Сар Герл болн Оэлун күүкднь 11-ч болн 7-ч классмудт сурна.
Одахн Оэлун отхн күүкнь нәәрүлҗ бичлһнә Цугәрәсән марһанд ончрад, өөрхн элгн-садна төлә байр-бахмҗ үүдәв. Гилән Борисовна наһц ээҗнь олн җилдән чөткрин хумс болн моһан өвр хадһлҗана. Өрк-бүлин әрүн тоотыг энүнд ээҗнь өгсн бәәҗ. Мел энүнә тускар Оэлун нәәрүлҗ бичәд, марһана жюрин гешүдин оньг авлсн болдг. Эн әрүн тоотыг Цаһан элнцг ээҗнь олзлад, кү хәләдг билә. Келхд, эннь Сиврт күрәд, хәрү ирсмн. Тегәд энүг цаарандан әрүнәр хадһлад, эврәннь үрдтән болн ачнр-зеенртән үлдәх зөвтәвидн, гиҗ Оэлун келнә.
Эндр Саглр Ивановна Элст балһсна һардврин әңгин һардачар көдлнә. Хамдан көдлҗәдг үүрмүд дунд эн бас үлгүр-үзмҗ болна. Баахн мергҗлтнр ямр чигн төрәр сүв-селвг авхар ирнә. Эк күн чик сурһмҗ өгхлә, үрднь эрк биш һазр-усндан, орн-нутгтан туста улс болҗ өснә. Өөрдҗәдг экин сән Өдрлә Саглр Ивановнад болн мана таңһчин экнрт эрүл-менд болн цаһан хаалһ дурдҗанавидн!
КАРСАНА Евгения

Видео