Хол Сербия нутгт болсн харһлтс

Сегодня, 11:44 | Общество, Таңһчин зәңгс, Зіњг

Одахн Сербия орн-нутгтла нөкцлтҗәдг балһсдын орлцлһтаһар нарт-делкән хург болв. Хальмг Таңһчин делегац терүнд бас орлцв.
Сербийин Ниш балһснд Константин хаана болн энүнә Елена хатна әрүн сән өдрлә ирлцҗ эн хург-наадм бүрдәгдв. Соньн көтлвр күцәлһнә йовудт «Нарт-делкән нөкцлт болн зуульчллһна халхар балһсдын хамцу төсвсин делгрлт» төрәр болсн сүүрт мана таңһчин делегац орлцв. Делегациг һардҗ йовсн Элстин һардврин толһачин дарук Довгопола Дмитрий мана хотл балһснд зуульчллһ делгрүллһнә халхар күцәгдҗәдг төсвсин тускар тодрхаһар келҗ өгв. Ниш балһсна зуульчллһна департаментин һардач Горан Милославлевичиг мана төсвс зөвәр соньмсулв, хальмг үүрмүдлә дамшлтарн хувалцхар бәәхән медүлв. Тер мет хургин йовудт талдан кесг балһсдын һардврла харһад, Хальмг Таңһчла нөкцлт делгрүллһнә тускар бас күүндвр болв.
Довгопола Дмитрий мана таңһчин делегациг һардсн деерән дәкәд нег чинртә керг күцәв. 1946 җилд Элстин чонҗд мөргүл болсн цагт Иисус Христос бууҗ ирсиг әмтн үзсн билә. Тер ончта йовдл учрад, дигтә 80 җил болад, намртан эн өөн темдглгдхмн. Тегәд Дмитрий Сергеевич Митрополит Арсенийла харһсн кемд энүнд мана тал гиичлҗ ирх үрвр кев. Терүнәс нань Элстин болн Хальмг епархийин өгүлсн Иисусин шүтә энүнд белглв.
Хальмгин делегацин ханьд ирсн номт Цоросин Алтман Лазарь хаана туск тууҗиг сергәҗ келв. Энүнә үгәр, тавн җил хооран Белград балһснд ирхләрн нертә седкүлч Райко Джурджевичлә эн таньлдсн бәәҗ. Эн күн хальмгудын тускар сәәнәр меднә, тегәд Европд шар шаҗна түрүн хурл босхлһна тускар медүлсн болдг.
1920 җилд Сербийин хан Александрт Белградын нег захд моңһл зүстә улс бәәршлҗәнә гиҗ зәңглгдҗ. Тер орм энүнә алвтын медлд бәәсмн. Тегәд тер улсиг энүн тал авч ирхләнь, эдн хальмг улс болҗахинь медәд, соньн нег тууҗ келҗ өгсмн.
Кезәнә нег цагт Лазарь хан түрг келн-улсла болсн дәәлдәнд әмнәсн хаһцна. Дарунь энүнә үрд бәрәнд авгдв. Көвүднь түрг цергин ханьд орулгдв, күүкнь болхла түрг хаана гергн болв. Удл уга тиигәрән моңһл церг орҗ ирәд, бәәр бәрлдәд, Лазарин үрдиг сулдхна. Тиигхләнь Сербийин хан Александр хальмгудт тер ормдан үлдх зөв өгнә. Тер мет шар шаҗна түрүн хурл босхлһнд эн туслсн бәәҗ.
Хальмгин делегац Ниш балһсна толһач Драгослав Павловичлә бас харһв. Тодлхас, нидн үкр сард Н.Н.Пальмовин нертә Келн-улсин музей Ниш балһсна музейлә нөкцлтин бооца батлсн билә. Энүнә ашт хальмг-сербск нөкцлт делгрәд, тууҗин, сойлын болн талдан халхар хамцу төсвс күцәх арһ учрв.
Хургин сойлын көтлврин йовудт Хальмг Таңһчин ачта артистк Босхмҗин Диана орлцснь бас темдгтә болв. Хальмгудын кезәңк ут ду дуулад, олн-әмтнә оньг авлв. Сербийин сойлын министр Никола Селаковичиг мана хальмг сойл бас соньмсулсн болдг. Хальмгин делегацин элчнр болхла энүнд «Җаңһр» алдр дуулврин дегтр белглв.
Эн йовлһна ашт батлсн бооцас сән йовудтаһар күцәгдәд, Хальмг Таңһчин залвр нарт-делкән нөкцлтән цаарандан улм өргнәр делгрүләд бәәхнь лавта.
КАРСАНА Евгения

Видео