Салдсин эцкиг ачлв

Сегодня, 11:40 | Общество, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) Ахлач Артем Михайлов болн таңһчин Олна палатын ахлач Мучан Батыр Көтчнрт бәәдг медәт Мөңкән Сергейиг «Салдсин эцк» гидг медаляр ачлв.
Эн ачлвр цергә шишлң керг-үүлдврт даалһвран күцәһәд, залу-зөрмгән һарһсн көвүдин эцкнрт бәрүлҗ өггднә. «Салдсин эцк» гидг медалиг Әрәсән эцкнрин олна ниицән зарлад, үрдтән төрскнч седклтә сурһмҗ өгсн эцкнрин ач-тус темдглнә. Мөңкән Сергей авальтаһан һурвн үрән өскәд-босхв. Ууһн Евгений көвүнь подполковникин цолта, эндр цергә даалһвран күцәҗ йовна. Елена күүкнь хазна халхар көдлҗәнә. Отхн Александр Ар Кавказд болсн цергә керг-үүлдврт орлцсмн, 2022 җиләс авн цергә шишлң керг-үүлдврт орлцҗ дәәлдв. 2025 җилд әңгин командир Мөңкән Александр цергә даалһвран күцәҗ йовад әмнәсн хаһцв. Сергей Бюрюновичин зе көвүн Санҗин Олег Сирийд цергә даалһвр күцәсмн, 2022 җиләс авн бас цергә шишлң керг-үүлдврт орлцв. Цергә даалһвран зөрмг кевәр күцәһәд, Төрскәннь төлә баахн салдс әмән өгв. Мөңкән Александр болн Санҗин Олег Зөрмгин орденәр ачлгдсмн.
- Тадн көвүндән болн зеедән чик сурһмҗ өгснд бидн ик ханлтан өргҗ, теднә зөрмг йовдл кен-негнднь бахмҗ үүдәнә. Теднә нерд мана тууҗд зөвтә орман эзлв, залу-зөрмгнь болхла дорас өсч йовдг үйнрт Төрскндән үнн-чик кевәр цергллһнә үлгүр болхмн, - гиҗ Артем Михайлов келв.
ДАВАН Наталья

Видео