Алвна заканд сольвр орулв

Эн долан хонгт Хальмг Таңһчин Улсин Хуралын (Парламентин) 24-ч дарани биш сессь болв. Сүүрин эклцәр таңһчин Улсин Хуралын Ахлач Артем Михайлов селәнә эдл-ахун көдләчин сән өдрлә цугтаһинь йөрәв. Селәнә эдл-аху мана таңһчин экономикин һоллгч халх болна, мадна ик зунь селән һазрт өсәд-боссмн, кесгнь селәнә эдл-ахун халхар көдлҗәнә гиҗ Артем Васильевич темдглв. Хальмг Таңһчд федеральн инспектор Сергей Бойко, таңһчин Улсин Хуралд Хальмг Таңһчин Толһачин элч Манҗин Араш, зөв-йосна болн зарһин бүрдәцсин элчнр сессин көдлмшт орлцв.
Дарани биш сессьт зуг хойр төр хәләгдв, эннь алвна туск заканд сольвр оруллһна болн орн-нутгин закадын төсвс дөңнлһнә туск төрмүд болв. Депутатнр хәләгдсн төрмүдәр ухан-тоолврарн хувалцад, дарунь ирлцңгү шиидврмүд батлв. Амр кевәр алвна мөңгән өгдг (УСН) улсин төлә алвна кемҗә батллһна туск таңһчин закана 1-ч статьяд сольвр оруллһна тускар Хальмг Таңһчин залврин Ахлачин негдгч дарук – таңһчин финансин министр Шурһчин Очр цәәлһвр өгв. Дааврта һардачин темдглсәр, таңһчин закаг орн-нутгин заканла ирлцүлхин төлә эн төсв белдгдсмн. Сольвр орулгдсна ашт ямаран бүрдәцс болн арһлачнр УСН-иг олзлҗ чадхнь батлгдхмн. Тиигәд, Әрәсән залвр батлсн экономикин үүлдвр күцәдг болн теднә некврлә ирлцдг бүрдәцс болн арһлачнр алвна мөңгиг баһрулгдсн алвна кемҗәнлә ирлцҗ өгдг болхмн. Депутатнр министрт соньмсулҗадг төрәр сурвр өгснә дару таңһчин заканд сольвр оруллһиг нег дууһар дөңнв.
Таңһчин Улсин Хуралын Ахлачин дарук Бадмин Вячеслав хойрдгч төрәр зәңгллһ кеһәд, орн-нутгин 24 закана төсв хәләгдснә тускар келв. Депутатнр теднәснь 23 закана төсвиг дөңнх шиидвр авв. Энүгәрн дарани биш сессь көдлмшән төгсәв.
БАТАН Сәәхлә