Экин дурн мөңк

Күн болһна җирһлд эк хамгин эңкр, дурта болн хәәртә күн болна. Эк күн сүл әмсхл күртлән үрнәннь төлә бәәдг. Үрнь өсәд-босад күн болсн бийнь эк арднь зовҗ, эрүл-дорул хотта-хоолта, өмсх хувцта йовну угай гиҗ седкләрн зовдг. Сән авъяст тохрсар, үкр сарин сүл нарн өдрлә мана орн-нутгт экин Өдр темдглнә. Өрк-бүл болһнд эн өдр эңкр экдән цецгүд белглҗ, оларн цуглрна.
Элст балһснд бәәдг өнр-өсклң Ходеевихнә өрк-бүлд эн өдр байрта-шуугатаһар давна. Алтана, Баира, Сар-Герл, Делгр болн Арслң зург зурад, ке-сәәхн кегдл кеһәд, эңкр экән сән өдрин байрла йөрәнә. Делгр Сергеевна күүктәһән сенр, шимтә хот-хол белдәд, ширә эргҗ хамдан цаган сергмҗтәһәр давулна. Дарунь эдн элнцг ээҗ Александра Цереновна Ходеевад золһҗ одна. Найн тавн наста ээҗ Виктор ачнь өрк-бүләрн ирхиг медәд, җичнрән шикр-балтаһар тосна. Цаһан седклтә, килмҗтә, җөөлн заңта ээҗиг Алтана җичнь бичкндән мана алтн ээҗ гиҗ келдг бәәсиг цуһар тодлна. Эн өдр Ходеевихнә өрк-бүл дәкәд хойр ээҗдән гиичд одна. Нина Матвеевна болн Вера Дмитриевна ачнрнь болн зеенрнь ирхиг бас күләнә.
- Би эврән олн үртә өрк-бүлд өсләв, ардасн дү күүк-көвү дахуллав. Бичкнәсн авн дүүнрән хәләһәд, герин көдлмш кеһәд, эк-эцкдән нөкд болдг биләв. Ода эврән тавн үртә болад, күүкдтән чик сурһмҗ өгч, нег-негән хәләһәд, ниитә бәәтн гиҗ сурһнав. Ууһн Алтана ода оютн, Баира 10-ч класст сурна, икр Сар-Герл болн Делгр 5-ч класст сурна, отхн Арслң һунта, бичкдүдин садт орна. Күүкд зурдг болн биилдг билгтә, спортар бас соньмсна. Экм болн хадм экм ачнр-зеенрән килмҗлҗ хәләнә, хоорндан цуһар ниитә бәәнәвидн. Ах болн баһ үйин улс ниитә бәәхлә, өрк-бүл бат болдгнь лавта, - гиҗ Делгр Сергеевна келнә.
Һарсн үрн экин сурһмҗар, һазрин өвсн чиигин элвгәр гиҗ келсн цецн үгмүд бәәнә. Күүкд күн герин чимг болҗ, үрдтән чик сурһмҗ өгч, ах улсиг күндлдгиг дасххла, күүкднь өлзәтә сән үрд болҗ өсхнь маһд уга. Шидр Элстд экин Өдр угтҗ 11 өрк-бүл «Күүкдтән чик сурһмҗ өгсн төлә» гидг темдгәр ачлгдв. Баһ гиснь тавн үр асрад, отг-әәмгтән тоомср олсн, күүкднь сурһулян сәәнәр сурдг, олна бәәдл-җирһлд шунмһаһар орлцҗ ик күцәмҗ бәрсн эк-эцкнр шишлң темдгәр ачлгдад, 100 миңһн арслңга мөрә авв. Өөдән ачлвр авсн өрк-бүлмүд дунд тавн үртә Виктор болн Делгр Ходеевихн ачлгдснь бахмҗта болв.
ДООҖАН Наталья
ЗУРГТ: Ходеевихнә өрк-бүл элнцг ээҗ Александра Цереновнала хамдан