Нас утдуллһн (авъяс)

Нас утдуллһн – кезәңк хальмг авъяс мөн. Мана хальмг улст дала авъясмуд бәәнә. Эдн дунд «нас утдуллһн» ик чинр зүүнә. Хальмг литд җилмүд эврә нерәдлһтә: туула, лу, моһа, мөрн, хөн, мөчн, така, ноха, һаха, хулһн, үкр, бар мөн. Күн ямаран җилд һарна, тиим җилтә болна. Арвн хойр җил болад, дарук җилднь насн ордг. Насн орхла, насан утдулх кергтә. Җил орхин өмн гелңд одад нас утдулдг, ном умшулдмн. Гелң тал одхларн цә, тос, шикр-балта авч оддмн, мөңгәр бәрц бәрдмн, шүтәнднь мөргдмн. Гелңд одхларн ээҗ-аавдан йөрәл авхулдмн, өөрхн улстан нерәдәд киилг, эд өргҗ мөргдмн.
Залу күүнд насинь җилнь орхас өмн утдулдмн. Күүкд күн болхла, зулын өмннь чигн, зулын хөөннь чигн насн орчксна дару утдулҗ болна.
Нас утдуллһна авъясиг нег дәкҗ күцәдмн. Зәрм улс давҗ тусад, хойр-һурв дәкҗ насан утдулна. Эннь хаҗһр йовдл мөн. Тенд нег сән гелң бәәнә гиһәд, энд нег гелң бәәнә гиһәд, цугтаднь одад йовхмн биш. Нег гелңд нег дәкҗ одад, насан утдулдмн. Насна дольг гиһәд гелңд невчк эләдәр бәрц бәрх кергтә.
Эн орчлң деер күн нас наслдг, нег җирһлтә болдг. Кедү нас наслтха гиҗ заячнь заясн болна, тедү насндан күн күрдг болҗана. Җиләс җилд Зулын өдр күн насан авад йовдг. Тер авсн насан күн кевтәһәр эдлх кергтә. Оньдин дөрвн цагт кен медәтнрән күндлҗ, өвкнрән мартлго, эдндән дееҗ өргҗ, һазр-усндан мөргдмн. Өсксн эк-эцкән һундалго, ах-дүүһән мартлго, кергтә цагтнь нег-негндән нөкд-җивр болҗ йовдмн.
Хальмг авъясмудан медәд, медҗ авсан мартхмн биш, дарук үйд күргх кергтә. Энүгән бәрҗ, күцәҗ йовхла, энтн әмнд туста болдмн, сойлнь өөдлдмн.