Үйнрин залһлда батрулсн марһан

Экин сән өдрт нерәдҗ Әрәсән күүкд улсин ниицәнә Хальмг региональн әңг «Өрк-бүлин авъясмуд: үйнрин залһлдан» гидг марһана дииләчнриг ачлв. Эн марһан дөрвн җил дарандан давулгдҗана, тегәд сән авъяст тохрв гиҗ келҗ болхмн. Терүнд орлцачнр ут ду дуулв, хальмг келәр шүлг айслулҗ умшв. Эн җил мана орн-нутгт Төрскән харсачин җил болҗана, Алдр Диилврин 80 җилин ончта өөн темдглгдв, тегәд «Мини өрк-бүлин баатрмуд» гидг онц марһан зарлгдсн билә.

Әрәсән күүкд улсин ниицәнә Хальмг региональн әңгин ахлач Кинзән Киштән марһанд орлцачнриг экин сән Өдрлә йөрәв. Киштән Ивановнан темдглсәр, Төрскән харсачин җилд нерәдҗ түрүн болҗ зарлгдсн «Мини өрк-бүлин баатрмуд» гидг марһанд сурһульчнр болн оютнр шунмһаһар орлцв. Эдн эк-эцкнртәһән болн багшнртаһан шинҗллтин болн хәәврин көдлмш кеһәд, Төрскән харсгч Алдр дәәнд, Ар Кавказд болсн болн цергә шишлң керг-үүлдврт орлцачнрин туск соньн зургуд, бичгүд цуглулв. Хальмг Таңһчин Келн-улсин архив өрк-бүлмүдт хадһлгдҗадг дәәнә цага бичгүд, хуучн зургуд әмтнәс орулҗ авна, тегәд марһанд орлцачнр өвкнриннь тууҗиг хадһлхин төлә эн шишлң саң бүрдәлһнд тәвцән орулхла сән болхмн. Ирлцңгү марһанд сурһульчнр дунд Мушан Дольган (5-11 наста бичкдүд), Гангулин Альма (12-17 наста бичкдүд) болн оютнр дунд Манҗин Элистина дииләчнрин нер зүүһәд ачлгдв.
Харм төрхд, ут ду дуулдг улс дунд болсн марһанд зуг негхн күн орлцв. Лагань балһснд бәәдг Пелагея Уляшаева «Тег мини» гидг ду дуулад ачлвр авв. Медәт эврә сән дурар үүлддг «Лагань» гидг ансамбльд орна. Күүкд күн олн җилдән уячар көдлҗ йовсмн, ода ачта амрлһнд бәәнә, сул цагтан ду дуулхдан дурта. Эднә өрк-бүлд цуһар дууч улс мөн, Пелагея Сергеевнан Валентина күүкнь бас билгтә. Района сойлын Герин һардач Светлана Черняева болн ансамблин һардач Нимгрә Лариса энүнд дууһинь бичҗ авхд нөкд болснд, марһанд белдснд медәт ик ханлтта бәәнә. Кинзән Киштән медәтд Диплом болн үнтә белг бәрүлҗ өгәд, өвкнриннь билг-эрдм, сойл хадһлҗ йовхинь үнлв.
Хальмг келәр шүлг айслулҗ умшсн сурһульчнр болн оютнр дунд талын келн-улсин бичкдүд орлцснь темдгтә болв. Сарпан района Кануковск дунд сурһулин багш Никән Иринан келсәр, энүнә сурһульчнр хойр җил дарандан эн марһанд орлцҗ дииләчнрин тоод орҗана. Эн җил Амина Магомедова болн Елизавета Текучева хальмг келәр шүлгүд айслулҗ умшад ачлгдв. Джамиля Магомедова болхла өрк-бүлиннь тууҗар соньмсад, зөрмг өвкнриннь туск зәңгллһ кесндән бас темдглгдв. Хальмг шүлгчнрин үүдәврмүд айслулҗ умшсн сурһульчнр дунд Бухан Намҗл (5-11 наста бичкдүд) болн Манҗин Аюна (12-17 наста бичкдүд) диилвр бәрәд, күүкд улсин олна ниицәнә таңһчд үүлддг әңгин Күндллһнә һашгар ачлгдв. Оютнр дунд Годжан Герл болн Окна Дорҗ хальмг келәр сәәхн кевәр шүлг умшв.
Чернобыльд болсн аюлынаш уга келһнд орлцсн улсин таңһчд үүлддг олна ниицәнә ахлач Һучна Борис марһанд орлцсн бичкдүдт улм ик күцәмҗ бәрхиг дурдв. Хальмг Таңһчин ветеранмудын хүүвин нерн деерәс күүкд улсин экин өдрлә йөрәһәд, Кинзән Киштәнд Әрәсән ветеранмудын төв хүүвин Күндллһнә һашг бәрүлҗ өгв. Дорас өсч йовдг бичкдүдт төрскнч сурһмҗ өглһнд, цергә даалһвран күцәҗ йовдг нег һазра улсиг дөңнҗ эврә сән дурар олн керг-үүлдвр күцәдг Зоя Винтуляк болн Андрей Сергиенко Хальмг Таңһчин Улсин Хуралын (Парламентин) Ахлачин Ханлтын бичгүдәр ачлгдв. Эн марһанд җил болһнд сурһульчнриг белдҗ дөң-тусан күргдг багшнр Әрәсән күүкд улсин ниицәнә Хальмг региональн әңгин Күндллһнә һашгар темдглгдв. Дууч Эрднин Лилия хальмг ду дуулҗ көгҗмин белгән экнрт нерәдв. «Дари добро» гидг буйнч седклин саңгин ахлач Эльза Шамова марһанд орлцач болһнд белг нерәдв.
ДООҖАН Наталья
ЗУРГТ: Әрәсән күүкд улсин ниицәнә Хальмг региональн әңгин ахлач Кинзән Киштән Бухан Намҗлд ачлвринь
бәрүлҗ өгчәнә