Хальмг номтнрин ончта диилвр

Хальмг ик сурһулин коллектив Әрәсәд нүүрт һарад, «Приоритет-2030» төсвин орлцач болҗ өөдән нерән иткүлв.
Одахн Хальмг ик сурһулин номтнр болн багшнр орн-нутгин ик сурһульмудын марһанд йилһрәд, «Приоритет-2030» көтлврт шинәс орв. Тер ончта йовдлын тускар ик сурһулин һардач Салан Бадм шидр болсн харһлтд седкүлчнрт зәңглв.
- Тиим шиидвриг батлхин төлә Әрәсән ик сурһулин болн номин Министерствин көдләчнр болн шинҗләчнр олн халхар мана үүлдвриг үнлв, тер көдлмшт номин болн бизнесин ниицәсин шинҗләчнриг орлцулв, – гиҗ харһлтын эклцәр Бадм Катинович темдглв. - Эн җил «Приоритет 2030» көтлвр «Баһчуд болн бичкдүд» гидг Келн-улсин төсвин кемҗәнд күцәгдҗәнә. Ик сурһулин делгрлтин шинрүлгдсн көтлвриг бидн комиссин оньгт тусхалавидн.
Ниигмин сүлҗәнд нөкцлтиг мана номтнр болн багшнр өргҗүлҗәнә, хальмг вузин оютнр Әрәсән болн һазадын орна ик сурһульмудт дамшлһ авна, тернь өдгә цагин некврлә ирлцҗәнә. Тер мет хальмг оютнрт немр эрдм авх цуг таал бәәнә. Арһлачнрин авг-бәрцәр ул кеҗ эврә үүлдвр бүрдәх арһ өггдҗәнә. Онц шин эв-арһс олзлгдҗана, сурһулин көтлврмүд күцәгдҗәнә. Оютнрин болн аспирантнрин, баһ наста номтнрин шин төсвс болн цуг көтлврмүд тохрахин төлә 100 сай арслң йилһгдҗәнә.
13 ик сурһулин багмуд дөрлдәнә орлцачнрин тоод орв, эдн цуг неквриг күцәҗ чадсн уга. Тегәд эдн мөңгәр теткгдшго, эврә арһ-чидләр төсвән күцәх. Хальмг номтнр болхла «Приоритет-2030» һоллгч төсвин орлцачнрин тоод орв, тегәд мана вузин цуг номтнрт болн багшнрт ханлт өргх кергтә. Тер мет мана таңһчин Толһач Хаска Батуд болн залврин Ахлач Босхмҗин Гиләнд ханлтан өргҗ, ик ач-тусинь темдглхәр седләв. Тиим кевәр энтн цуг мана Хальмг Таңһчин диилвр болҗана.
Таңһчин залврин Ахлачин негдгч дарук, финансин министр Шурһчин Очр, мана вузин номин-үүлдврин төвин һардач Хахлинә Арслң болн мал өсклһнә Цугәрәсән күрәлңгин һардач, РАН-а академик Наталья Зиновьева (зургт) мана көтлвриг харссн багин ханьд орсмн.
Тер мет харһлтд Салан Бадм «Агробиотех Хальмг Таңһчин теегт» гидг төсвин тускар келҗ өгв. Селәнә эдл-ахун нүүрлгч кесг эв-арһс эн көтлврт өргнәр олзлгдҗана. Төсвин һол күслнь агросервисин өдгә цагин төв бүрдәлһн болҗана. Мал өсклһнә кергиг өргҗүлхин төлә эн төсвин улд кесг туслмҗ күрггдхмн. Энд геномин шинҗллт кегдх, бәрмт цаасн өггдх, тохма мал хулдгдх, экспортын үүлдвр күцәгдх болв. Цуг тер тоот Әрәсәд мал өсклһнә халхиг делгрүллһнд болн хот-хоолын төсв күцәлһнд туслх зөвтә.
Хальмг ик сурһулин номтнр болн багшнр эндр номин көдлмшән өргҗүләд йовна. Түүнә төлә эдн Әрәсән номин Академин болн сурһуль-эрдмин Академин күрәңлгүдлә өргнәр нөкцлтҗәнә. Аштнь нер туурсн номтнр Хальмг ик сурһулин номтнрла хамцу шинҗллт кедг болв. Түүнә чинрнь өөдләд орн-нутгин болн нам цуг делкән кемҗәнд олзлгддг болв.
Цааранднь келхлә, орн-нутгин экономикин төлә ик чинр зүүҗәдг долан зөрүллтәр Хальмг вузин номтнр шаңһа даалвһр авв. Терүг күцәхин төлә шаңһа кемҗәнд көдлмш кегднә, тиим кевәр тернь ик дааврта керг болҗана.
Тер мет «Приоритет-2030» көтлврин кемҗәнд хальмг вузин номтнр тохма малын көрңгиг тоод авлһна шин кев-янз тогтав. Түүнә тускар Хальмг ик сурһулин тооһин заллтын һардач Онтан Андрей келҗ өгв.
- Таңһчин селәнә эдл-ахун министерств тохма малын сән тоотыг үзүлҗ, терүг дигтәһәр олзлх арһ өгчәнә. Шаңһа бүрдәцст тохма малын то цаглань медүлх арһ өгчәнә эн эв-арһ цааранднь өргҗәд бәәх болв.
Тиим кевәр Хальмг ик сурһулин номтнр өдгә цагин эв-арһиг кесг халхар күцәмҗтәһәр олзлҗахан иткүлв. Шинҗллтин-номин көдлмш цаарандан күцәгдәд, вузин цуг номтнрин болн багшнрин хамцу үүлдврнь бат ул тогтахнь лавта гиҗ сангдна.

ТҮРВӘН Һуна