Делгә Эрднин медаляр ачлгдв

Хальмг Таңһчин Улсин Хуралын (Парламентин) Ахлач Артем Михайлов таңһчин Толһач Хаска Батун даалһврар цергә шишлң керг-үүлдврт орлцачнр Одган Николайд болн Манҗин Владимирт Советин Союзин Баатр Делгә Эрднин медаль бәрүлҗ өгв. Таңһчин Улсин Хуралд болсн харһлтд цергчнр болн теднә өрк-бүлмүд, Хальмг Таңһчин Олна палатын ахлач Мучан Батыр орлцв.
- Цергә шишлң керг-үүлдврт залу-зөрмгән үзүлҗ даавран үнн-чик седклтәһәр күцәснд таңһчин цуг улсин нерн деерәс таднд ик ханлтан өргҗәнәв. Тана зөрмг болн чаңһ-чиирг цуг маднд үлгүр болҗ, мана улсин төрскнч седклиг медүлҗәнә, – гиҗ Артем Васильевич темдглҗ, йөрәлин үгдән келв.
Советин Союзин Баатр Делгә Эрднин медаль эн җил түрүн болҗ бәрүлҗ өггдг болв. Цергә шишлң керг-үүлдврт орлцҗадг нег һазра улс эн өөдән ачлврар темдглгдҗ, Делгә Эрднин зөрмг йовдлар үлгүр кеҗ, цергә даалһвран үнн кевәр дааҗ йовна. Харһлтд цергчнрин эк-эцкнрт ханлтын үг келгдснь байрта болв. Одган Николайин эцк Валерий Очировичд «Салдсин эцк» гидг медаль бәрүлҗ өггдв, эн ачлвриг Әрәсән Олна палат зарлсмн. Цергчин экнь Людмила Очировна Күндллһнә һашгар ачлгдв. Төрскнч седклтә, зөрмг дәәчиг өксәд, чик сурһмҗ өгсн төләднь цергчин эк-эцкиг Мучан Батыр йөрәв.
Харһлтд «Баатрмуд 08» көтвлрт орлцач, таңһчин Улсин Хуралын Ахлач Артем Михайловин һардврт мергҗлтән өөдлүлҗәдг Одган Арслан бас орлцҗ, үүрмүдән болн теднә элгн-садниг ачлвр авснлань йөрәв. Арслан Владимирович үүрмүдиннь зөрмгиг темдглҗ, эдн аврлт уга бәрлдәнд баатр кевәр орлцҗ, цергә даалһвран күцәсн төләдән өөдән ачлврар ачлгдх зөвтә гив. СВО-н ветеран сурһулин көтлврин тускар ухан-тоолврарн хувалцҗ, терүнд орлцҗадг цергчнр өсәд-боссн һазриннь делгрлтд ик тәвцән орулхдан белн бәәхиг темдглв. Зөрмгин орденәр ачлгдсн Артем Михайлов энүнд дамшлт хоршалһнд, шин медрл даслһнд дөң-тусан күргҗәхд цергә керг-үүлдврин ветеран ханлтан өргв.
Харһлт үр-иньгин бүлән таалд давв. Цергчнрт болн элгн-саднднь таңһчин һардвр килмҗән тусхаҗ, олн зүсн төрмүдтнь орлцҗ дөңгән күргҗәхнь чидл немҗ, төрскн һазртан туста болхд урмд өгнә гиҗ дәәчнр келв.
БАТАН Сәәхлә