Эврә сән дурар олнд тусан күргнә

Маңһдур цуг нарт-делкәд эврә сән дурар үүлддг улсин сән өдр темдглгдҗәнә. Эн өдриг 1985 җиләс авн ООН-а Генеральн ассамблейин шиидврәр темдглдг болсмн, мана орн-нутгт болхла Әрәсән Президентин зәрлгәс иштә 2017 җиләс авн эн өдр зарлгдв. Эврә сән дурар үүлддг улс буйнч седклин болн олна седвәрәр бүрдәгдсн керг-үүлдврмүд, спортын марһас, наадм болн концертсд давуллһнд дөңгән күргнә. Мана таңһчд эн җисән бас күцәмҗтәһәр делгрҗәнә, эврә сән дурар олн-әмтнд дөң-тусан күргх улсин то өсәд йовна. Эн намрар мана таңһчд болсн шар шаҗна нарт-делкән ик хург давуллһнд, кесг һазрас ирсн гиичнриг тосч авлһнд эврә сән дурар үүлддг улсин тәвциг үнлҗ болшго. Эднә ач-тусар ик хург өөдән кемҗәнд давулгдв, ирсн гиичнрт Хальмг һазрт давулсн өдрмүд мартгдшго кем болҗ тодлгдв.
Эн җисәнд баһчудла зерглҗ ах үйин улс шунмһаһар орлцҗ олна кергт тәвцән орулҗ йовхнь бахмҗ үүдәнә. Шулун-шудрмг, седвәртә, олна нүүрт йовдг медәтнр «Серебряные волонтеры» гидг олна ниицәнә үүлдврт орлцҗ, таңһчин бәәтхә, Әрәсән болн нарт-делкән керг-үүлдврт нер һарна. Тиим улсин негнь Яшалтан района ветеранмудын Хүүвин ахлач, «Дорогою добра» клубин һардач Эльдән Галина болна. 2022 җилд района әмтнә социальн теткврин комплексн төвин медлд эн клуб бүрдәгдхлә, Галина Николаевна терүг һардв. Урднь хөрн җилдән района сойлын Герин улд «Алтн булг» клубиг һардҗ йовсн күүкд күн хальмг-орс улсин амн үгин зөөр хадһллһна, сойл болн байн зөөр делгрүллһнә керг күцәҗ йовсмн. Ах үйин улсин төлә бүрдәгдсн «Дорогою добра» клубд зуульчллһна, чик авг-бәрцин болн һарин эрдмин әңгүд үүлднә. Медәтнр буйнч седклин керг-үүлдврмүд бүрдәнә, дорас өсч йовх баһ үйд төрскнч сурһмҗ өглһнә керг күцәнә, һанцарн бәәдг болн җирһлин күнд таалд туссн медәтнрт дөң болна. Галина Николаевнан келсәр, эдн района селәдт бәәдг медәтнриг Яшалта селәнд цуглулад, Советин Союзин Баатр А.Метяшкинә, Төрскән харсгч Алдр дәәнә баатр Л.Пэрна, цергә шишлң керг-үүлдврт орцлсн дәәчнрин бумблвс үзүлҗ, харһлтс бүрдәһәд, олн төрәр күүндҗ, цаган сергмҗтәһәр давулна. Ачта амрлһнд һарад, һанцарн бәәдг медәтнриг ямр нег кергәр соньмсулад, хамдан буйнч седклин кергт орлцна. Үлгүрнь, Татьяна Сечканова үүрмг сувс хулдҗ авад, цергчнрт шүтә кенә, Таиса Некрасова бас һартан өөтә, эн ке-сәәхн кегдлмүд болн наадһас уйна.
- Сүл һурвн җилин эргцд би эврә сән дурар үүлддг олна бүрдәцин гешүн болҗ орлцҗанав. Олна кергт орлцҗ би талдан улст дөңгән күргҗ, шин медрл хоршаҗ авв, кесг улсла таньлдҗ, теднә дамшлтын тускар медҗ авв. Әмтнд туста болдгнь маднд ик урмд өгнә, бидн зоваҗадг гемин тускар мартҗ, олна кергт орлцхар шуннавидн. Эн намрар би шар шаҗна ик хургт орлцсн биләв, талдан регионмудас ирсн кесг гиичнриг тосад, мана таңһчла таньлдулсн биләв. Хөөннь Краснодарск крайин волонтермудла харһад, теднд гиичләд, теднә күцәҗәдг көдлмшин тускар медҗ авсн биләв. Ирх җилд эдн бамб цецгин наадмд ирх үгән өгв. Иим харһлтс чидл урһаҗ, олн-әмтнд туста керг бүтәҗ үүлдхд урмд өгнә, – гиҗ Галина Николаевна келнә.
Эльдән Галина эврә сән дурар үүлддг медәтнрин клуб һарддг деерән цергә шишлң керг-үүлдврт дөң күрглһнә, дәәчнрин өрк-бүлмүдиг дөңнлһнә көдлмшт бас орлцна. Района «Ицлин бадм цецг» ниицән селәдәр үүлддг багмудын көдлмшиг хамцулҗ, цергә даалһвран күцәҗ йовдг нег һазра улст дулан хувц, эм, хот-хол, олн зүсн кергсл хулдҗ авна. Эврә сән дурар үүлддг медәтнр һуйрин зүүтә хот-хол белднә, дулан өөмс өлгнә, бу-селм бүркдг гөлм болн хорһн шам кенә. Галина Николаевна болхла бийнь нег өдрт миңһн һар боорцг болһна. «Кесг өдртән эврәннь цергчнр тал һарч чадлго кеер бәәсн нег салдс мана илгәсн боорцгар теҗәл кеһәд, әмд-менд үлдснәннь тускар келҗ өгсн билә. Хатад хагссн боорцгиг амндан бәрәд, бичкн-бичкнәр идәд, кесг өдртән кеер биләв, гиҗ келснь тодлгдв. Тегәд гемнәд удан зогсдг арһ уга болв чигн мана көвүдт боорцган шарад, цуһар әмд-менд иртхә гиҗ зальврнав. Мана керг цергчнрин әм аврҗ, ик чидл өгдгнь мана зүркн байрлулна. Чидл күрсәрн олна кергт орлцхв», – гиҗ медәт келнә.
ДАВАН Наталья