Хаслһна диг-даран зарлгдв

Хальмг Таңһчин ах санитарн эмчин үүл дааҗадг Евгений Джеваковин батлсн тогтаврас иштә грипп болн ОРВИ гем түгҗәхәс иштә бар сарин 2-ас авн Элст балһсна сурһуль-эрдмин бүрдәцст хаслһна диг-даран зарлгдсн бәәнә. Тер тогтаврас иштә хотл балһсна дунд, немр болн дунд шишлң сурһулин болн спортын бүрдәцсин, бичкдүдин садмудын, наадлһна хорасин үүлдвр цаг зуур зогсагдв. Тер мет шишлң заавр һартл эмнлһнә болн социальн теткврин бүрдәцст бас хаслһна диг-даран зарлгдв.
Әрәсән Роспотребнадзорин Хальмг Таңһчар үүлддг заллтын әңгин һардач Сергей Савченкон келсәр, сүл долан хонгт гриппәр болн ОРВИ-гемәр гемтсн улсин то 60 процентд өсв. Хальдврта гемәр гемтсн улсин то икдснә ашт эпидемиологическ бәәдлиг ясрулхин төлә хаслһна диг-дарана туск тогтавр батлгдв. Гемтсн улсин 48 процентднь грипп гем илдкгдв, наадкснь ОРВИ гемтә болҗана.
- Ирх долан хонгин ашар хотл балһсна сурһуль-эрдмин бүрдәцст хаслһна диг-даран зарлгдсна хөөн гемтсн улсин то баһрхла тернь уурулгдхмн. Кемр бәәдл эс ясрхла, хаслһна диг-даран цааранднь утдулгдхмн. Таңһчин әмтнә 40 процентнь хотл балһснд бәәдг учрар иим нәрн бәәдл тогтв, райодар гемтсн улсин то ик биш. Эн җил мана таңһчд хальдврта гемәс саглуллһна кем му бишәр давв, хамгин түрүнд бичкдүд, хуучта улс, сурһуль-эрдмин, эрүл-менд харлһна, бәәц тетклһнә, хулд-гүүлгәнә көдләчнр тәрлһ авв. «Ультрикс» болн «Совигрипп» вакцин олзлгдв, эдн гриппәс болн ОРВИ-һәс саглна. Авъяст тохрсар, дотр-дундын кергүдин, зөв-йосна бүрдәцс көдләчнрнь тәрлһ авхд дөң күргв. Таңһчд бәәдг әмтнә 60 процентнь тәрлһ авхмн гиҗ зуралгдсн билә, тер кемҗән күцәгдв, - гиҗ Сергей Павлович келв.
Хальдврта гемәр нурһлҗ бичкдүд гемнҗәнә. Нәрн бәәдлиг учртан авад, таңһчин бичкдүдин эмнлһнә эмчнр гемтсн күүкд-көвүдт дөң күргхин төлә гертнь одад, эрүл-мендин бәәдлинь шинҗлнә. Эмнлһнә мергҗлтнрин даавр эн өдрмүдт икдснә ашт балһсна дунд сурһульмудын эмчнр нөкд болҗана. Эн өдрмүдт халу дөрсн бичкдүдт фильтр-бокст бас дөң күрггдҗәнә. Өдрт 160 шаху шаху күн эмчин хәләврт ирҗәнә. Сүл хойр долан хонгт шишлң медицинск дөң күрглһнә төвд эмнлһнд туссн улсин то өсчәхнь темдглгдҗәнә. Ода тенд 49 күн эмнлһнд бәәнә.
Шишлң медицинск дөң күрглһнә «Сулда» төвин олн зүсн гемәс саглуллһна әңгин һардач Очра Галинан келсәр, намрин-үвлин кемд эрүл-мендән батрулҗ, чик авг-бәрцәр бәәх кергтә. Намрин эклцәр хальдврта гемәс саглуллһна тәрлһ эрк биш кех кергтә. «Грипп болн ОРВИ гем түгҗәдг цагла олн-әмтн цуглрдг һазрт одхасн саглх кергтә. Кемр керг-үүлдврт ирх кергтә болхла, чирәдән саглуллһна кегдл өмсх кергтә. Хальдврта гем түгҗәдг цагт дару-дарунь һаран уһаҗ цевр-цер бәәх кергтә. Юңгад гихлә, бидн олна көлгнд, лавкст эс гиҗ талдан һазрт йовсн цагтан олн зүсн тоот бәрҗ һар күрнәвидн. Һазаһас орҗ ирсн цагт һаран уһаһад, давста усар хоолан-хамран зәәлхлә сән болхмн. Һаза цевр аһар киилҗ, йовһар йовҗ цогц-махмудан батрулхмн. Гертән терзән секәд, цевр аһар орулх, цугинь уһаһад арчх кергтә, энтн бас эрүл-менд бәәхд туслна. Киитн цагт шимтә, сенр хот-хол, олн зүсн темс болн зер-земш идх кергтә. Давслсн хавстн, шар луувң, мәңгрсн болн нань чигн темсн эрүл-менд батрулна. Тер мет тәмк болн әрк-чаһр эдлхмн биш, бийән чикәр бәрҗ, керүл-цүүгән угаһар цаһан седклтә бәәх кергтә. Цуг эн тоот эрүл-менд бәәхд туслҗ хальвдрта гемәс харсна», гиҗ Галина Николаевна сүв-селвгән өгв.

БАТАН Сәәхлә