Әәдрхнд суврһн босхгдв

Әәдрхнд оюни чинртә үүлдвр болв. Энд Гегәрлтин суврһн тосхгдв. Оюни чик седклин болн ни-негн үүлдврин темдг болгч Гегәрлтин суврһиг әрүслҗ, ном умшҗ, олна үүлдврт оруллһна шаҗна йосрхл энд байрин бәәдлд күцәгдв.

Бурхн-шаҗна әрүн эн тосхлт Әәдрхнә Коноваловин нертә уульнцд бәәршлв. Энд түрүн болҗ шаҗна иим керг-үүлдвр күцәгдв.
«Хальмг» гидг Әәдрхнә мүҗин ниицән эн суврһиг тосхлһна седвәрин эк татсмн. Бурхн-шаҗнд шүтдг әмтнә балһсна негдлт эн керг-үүлдвр күцәлһнд орлцсмн. Суврһна тосхлт шаҗна цуг авъясар кегдв. Бәәрн һазрин сойлын болн шаҗна делгрлтд эн йовдл ик чинр зүүҗәнә.
Шин босхгдсн суврһиг әрүслҗ, ном умшҗ, үүлдврт оруллһна шаҗна йосрхлыг Бурхн Багшин Алтн сүмин гелңгүд Элстәс ирҗ күцәв. Хальмг Таңһчин Улсин Хуралд Таңһчин Толһачин элч Манҗин Арашин һардврт таңһчин делегац орлцв. Делегацин ханьд Хар Һазра района толһач Болдра Валерий, «Комсервис» МАУ-н һардач Доржина Айс Әәдрхнд ирҗ, бәәрн әмтнә байриг хувалцв. Тенд бәәдг олн хальмгуд, тер тоод бурхн-шаҗнд шүтдг әмтн суврһиг секлһнә байрт орлцв.
Гегәрлтин суврһн әмтн оларн ирҗ мөргдг орм болсн деерән сойлын болн шаҗна ик чинртә бәәрн болхмн. Иргчдән балһснд хурл тосхх сана әмтн зүүҗәнә. Өөрнь дәкн дөрвн суврһ босхад, тууврин цагт зовҗ, әмнәсн хаһцсн әмтнә санлд терүгән нерәдх седклтә бәәхән бәәрн улс келнә.
Бурхн-шаҗнд шүтдг улсин Төв оюни заллтын ахлач гевш Йонтенә темдглсәр, «Оюни үүлдвр ик делгрлт авчахинь бидн эндр үзҗәнәвидн. Келн-улсин авъясмуд сергәгдәд, бәәдл-җирһлд тохрагдҗ, сойлын делгрлт уралан ишкдл кеҗәнә. Иргч җирһл хөвтә болх ицл зүүлһҗ, эннь ик урмд өгчәнә».
Әрәсән улсин негдлтин җилин өмн өргнд Әәдрхнд Гегәрлтин суврһиг эдлврт оруллһн улсиг хамцулҗадг йовдл болҗана. Нег һазрт бәәдг әмтн ни-эвәр болн хоорндан нөкцҗ бәәлһнә темдг болҗ эн керг-үүлдвр күцәгдв.
Хальмг Таңһчин болн Әәдрхнә мүҗин залвр суврһиг тосхлһнд болн өөр эргндк бәәринь яслһнд күргсн ик дөң регионмуд хоорндк залһлданд иим төсвс ик чинр зүүҗәхинь медүлҗәнә.
Ашлад келхлә, Гегәрлтин суврһн оюни ик чинр зүүсн деерән Әрәсәд бәәдг келн-улсин хоорндк залһлдаг улм батрулҗана.

УШКАНА Сувсн