Сурһуль-эрдмин профсоюзин хург

Шидр Элстд Хальмг Таңһчин сурһуль-эрдмин болн номин көдләчнрин профсоюзин I хург болв. 2025 җил таңһчин сурһуль-эрдмин көдләчнрин профсоюзин шиидврәр бүрдәцсин профсоюзин җил гиҗ зарлгдсн билә, тегәд ик хургт орлцачнр эн җилин эргцд кеҗ-күцәсн көдлмшин аш диглв. Түрүн болҗ болсн ик хургт ут тоодан профсоюзин җисәнд шунмһаһар орлцдг 500 күн цуглрв. Хальмг Таңһчин күцәгч болн зака үүдәгч йосна элчнр, сурһуль-эрдмин профсоюзла нөкцҗ үүлддг бүрдәцсин һардачнр эн хургт бас орлцв.

Хургин эклцәр Элст балһсна 29-ч тойгта бичкдүдин садын сурһмҗлачнр «Бадм цецгин би» биилҗ болн 16-ч тойгта бичкдүдин садын күүкд хальмг келәр йөрәл тәвҗ билг-эрдмәрн байрлулв. Дарунь таңһчин сурһуль-эрдмин болн номин көдләчнрин профсоюзин ахлач Эдгән Цаһан хургиг нүр үгәр секәд, эн намрар таңһчд үүлддг бүрдәц 35 җилин өөнән темдглсиг зааһад, олна бүрдәцин үүлдврт ик тәвцән орулҗ, хамдан көдлҗәдг үүрмүдиннь зөв харслһна кергт тәвцән орулҗ күцәмҗтәһәр үүлддг, олн зүсн керг-үүлдврин седвәр татдг улсиг ачлхвидн гив. Хургин эклцәр дигтә эн өдр һарсн өдрән темдглсн улсиг тәәз деер дуудад, белг бәрүлҗ өгснь эднд байрта йовдл болв.
Хальмг Таңһчин Толһачин һардврин ахлач Кирилл Попов хургт орлцачнрт Хальмг Таңһчин Толһач Хаска Бату илгәсн менд күргв. «Мана таңһчд бичкдүдт, сурһуль-эрдмд ик оньг тусхагдна, тегәд сурһуль-эрдмин бүрдәцст багшнрин болн сурһульчнрин төлә сән таал тогтагдҗахнь Хальмгин иргчин төлә ик чинр зүүнә. Таңһчин сән-сәәхн иргчин болн делгрлтин төлә бидн арһ-чидлән негдүлҗ, хамцу үүлдх зөвтәвидн», - гиҗ Кирилл Попов йөрәлин үгдән темдглв. Хальмг Таңһчин Улсин Хуралын (Парламентин) Ахлач Артем Михайловин илгәсн бичгиг энүнә дарук Бадмин Вячеслав олнд умшад, профсоюзин үүлдврт шунмһаһар орлцҗадг көдләчнриг ачлв.
Хальмг Таңһчин сурһуль-эрдмин болн номин министрин үүл дааҗадг Александр Ким таңһчин профсюзин гешүдт ханлтан өргҗ, эднә дөңгәр болн шунмһа орлцатаһар багшнрин, сурһмҗлачнрин зөв харслһна, эн эрдмин чинр өөдлүллһнә кергиг хамдан хаһлҗ нөкцҗ үүлдҗәхиг темдглв. Профсоюзин ханьд селәндән болн балһсндан хамгин шунлтта, седвәртә, әмтнә төрмүдиг чинртәд тоолдг, өр-өвч седклтә улс орна, эдн онлна нүүрт йовна гиҗ дааврта һардач буульмҗтаһар келв.
Хальмг Таңһчин сурһуль-эрдмин болн номин профсоюзиг 1975 җиләс авн 2024 җил күртл ахлҗ йовсн Һәрән Галинаг болн Коокун Антонинаг хургт орлцачнр байртаһар тосад, эднә ач-тусиг темдглв. Таңһчин профсоюзин делгрлтд ик тәвцән орулсн сурһуль-эрдмин халхин ветеранмуд Нәәмнә Иринан, Дорҗин Кларан болн Какиша Викторин нерд Әрәсән сурһуль-эрдмин болн номин көдләчнрин профсоюзин Күндллһнә дегтрт орулгдснь бахмҗта болв. Хургин йовудт эн җилин эргцд давулгдсн керг-үүлдврмүдин, марһасин тускар келгдв, олна ниицәнә үүлдврт орлцҗ седвәртәһәр үүлддг улс ачлгдв. Таңһчин сурһуль-эрдмин көдләчнрин профсоюзин билг-эрдмин марһасин дииләчнр ду-бииһән үзүлв.
ДООҖАН Наталья