Җилин көдлмшин аш диглв

Хальмг Таңһчд Әрәсән юристнрин бүрдәцин әңг олн-әмтнд ирлцңгү дөңгән күргнә. Шидр «Калмыкия» РИА-н барин төвд седкүлчнрлә болсн харһлтын йовудт бүрдәцин элчнр көдлмшиннь тускар тодрхаһар келҗ, һарчах җилин ашинь диглв.
Цергә шишлң керг-үүлдвр эклснәс авн юристнр дәәчнрт болн теднә өрк-бүлмүдт ирлцңгү дөңгән өңгәр күргнә.
Әрәсән юристнрин бүрдәцин хальмг әңгин һардач Анастасия Кравцован келсәр, эн җилин йовудт СВО-д орлцачнрин болн теднә өрк-бүлмүдин гешүдин миңһн һар төрмүдт орлцсинь темдглв. Бүрдәцин юристнр социальн, ЖКХ-н, онц зөв батллһна, медицинск дөң күрглһнә, әмнәсн хаһцсн дәәчнрин элгн-саднднь мөңг йилһҗ өглһнә болн талдан олн төрмүдәр сүв-селвгән өгнә.
Тер мет Әрәсән юристнрин бүрдәцин хальмг әңгин мергҗлтнр олна бүрдәцслә бооцас батлад өөрхн залһлдҗ көдлнә. Тедн дунд «Төрскән харсачнр» саң, КСВО, СВО-н ветеранмудын бүрдәц болн талдан бүрдәцс мөн.
Элстд бәәтхә таңһчин райодар бүрдәцин мергҗлтнр йовад, ирлцңгү дөңгән бас күргнә. Терүнәс нань җилин йовудт юристнр телеүзлин соңсхврмудт орлцад, эврәннь үүлдврин тускар тодрхаһар келҗ, олнд зәңглсн билә. Немхд, җирн баахн юристнр шишлң сурһульд сурад, эндр ирлцңгү дөңгән бас күргҗ чадҗана.
ОЛЬДАН Цаһан