Өдгә цагин бүрдәц болхмн

Әрәсән Президент Владимир Путинә даалһврар ЮФО-д энүнә элч Владимир Устиновла хамдан Хальмгин Толһач Хаска Бату иргнмүдлә харҗ күүндв.
Элст балһснд бәәдг Аҗин Светлана А.С.Пушкинә нертә дегтрин саңгиг өдгә цагин бүрдәцд хүврүлх седвәр татв. Энүг ясад, сән кец-таал тогтаһад, баһчуд, идр наста улс болн медәтнр тенд цуглрад, цаган сергмҗтәһәр болн тустаһар давулҗ чадхмн гив.
– Мини даалһсар Элст балһсна һардвр эн төр хаһллһнд орлцхмн. Дегтрин саң хальмг келн-улсин кев-янзар кегдхмн. Тенд немр хорас болн талвңгуд секгдх. Элстихн болн гиичнр шинрүлгдсн дегтрин саңд бүрдәгдсн керг-үүлдврмүдт шунмһаһар орлцҗ чадхмн. Седвәр татсн Светлана Николаевнад ханлтан өргҗәнәв. Мел тиим улсин орлцлһтаһар мана балһсн болн таңһч кеерәд, өсәд-өргҗәд йовхмн, – гиҗ Бату Сергеевич темдглв.
ОЛЬДАН Цаһан