Медәтнрт килмҗән тусхаҗ

Күн болһна җирһл әдл болхш. Зәрм улс күүкдиннь болн олн ачнр-зеенриннь килмҗтә хәләврт көгшрнә, наадкснь болхла өсәд-боссн күүкдтән нүүҗ төрскн һазрасн салхар седхш. Тер цагт һанцарн бәәдг медәтнрт социальн көдләчнр дөң-тусан күргҗ, олн зүсн төрмүд хаһлна. Эдн нег-негнәннь седкл медҗ, элгн-саднла әдл байр-зовлңган әдл хувалцҗ, өөрхн улс болна. Целинн района Овата селәнд бәәдг Бельтрикә Зинаида арвн хойр җилдән социальн көдләч болҗ көдлҗәнә. Эн җилмүдин эргцд Зинаида Санджиевна энүнә хәләврт бәәдг медәтнрт итклтә нөкд болв.

Ода социальн көдләчин хәләврт зурһан медәт бәәнә, теднәснь Людмила Павловна Перекрестоваг эн түрүн өдрәс авн хәләҗәнә. Найн хойрта медәт ода һанцарн бәәнә, тегәд Зинаида Санджиевна арднь орҗ хәләҗ, геринь ахулҗ, хот-хоолынь болн эмин хулдҗ авна, усинь герүр орулҗ өгнә. Бийнь тас уга болхла, эн селәнә фельдшериг дуудад, эмнлһнә туст сүв-селвгинь авна. Зәрмдән медәт хот болһҗ өгхд дөң болхиг сурна, тегәд кех-күцәх көдлмш баһ биш. Социальн көдләч энүнә хәләврт бәәдг зурһан медәтд долан хонгт хойр-һурвн дәкҗ одна, болв зәрм төр учрхла дарунь ирнә. Медәтнр энүнә телефона тойгинь сәәнәр меднә, тегәд бат залһлда бәрҗ, ниитә бәәнә. Района әмтнә социальн теткврин комплексн төвин мергҗлтнр селәнүр дару-дарунь ирҗ, бас дөңгән күргнә. Тиигәд, психолог олн зүсн төрәр күүндҗ, сүв-селвгән өгнә. Үс кирһәч ирәд, медәтнрт туслмҗан күргҗ, эдниг сәәхрүлнә. Района эмнлһнәс флюоромобиль ирхлә, медәтнр эрүл-мендин шинҗллт кенә. Дәкәд «Эрүл-менд бәәтн!» гидг керг-үүлдврин йовудт ах үйин улст ик оньг өггднә, эмчнр гертнь чигн одна.
- Нанд көдлмшм таасгдна. Урднь уячин эрдмәр көдлҗ йовлав. Арвн хойр җил хооран социальн көдләч болад, нег һазра медәтнрт дөңгән күргҗәнәв. Мана көдлмш буйнта, туста болн ик дааврта болна, тегәд гемтә-шалтгта улст болн медәтнрт килмҗән тусхаҗ көдлхәр шуннав. Эн җилмүдин эргцд бидн нег-негнәннь заң болн авг-бәрц сәәнәр медҗ, ни-негн бәәнәвидн. Эдн насн җирһлиннь туршарт төрскн һазриннь делгрлтд тәвцән орулсн улс болҗана, тегәд зәрмдән баһ цаган тодлад, хамдан көдлҗ йовсн үүрмүдиннь тускар келҗ өгнә. Урднь мана селәнд бат, олзта-орута эдл-аху билә, тегәд эдн терүнә делгрлтд тәвцән орулсн улс мөн, – гиҗ Зинаида Санджиевна келнә.
Овата селәнд дәкәд хойр социальн көдләч бәәнә, эннь Җалһа Элст болн Босхмҗин Татьяна болна. Келхд, Элиста Бадмаевна хөрн шаху җилдән эн селәнд социальн көдләч болҗ көдлҗәнә, тегәд үүрмүдләһән дамшлтарн хувалцҗ, ямр нег төрәр сүв-селвгән өгнә. Татьяна Сармаевна болхла зурһан җилдән эн халхд үүлдҗәнә, ах үүрмүдәсн үлгүр авна. Сүл хойр җилд гемтә-шалтгта улсиг асрлһна нөкд Наталья Прохорова көдлҗәнә. Тиигәд, эдн нег-негндән дөң болҗ, хамдан ниитәһәр көдлҗ, селәнә медәтнриг хәләҗәнә.
Бельтрикә Зинаида баһ цагтан Элстд УПК-д сурад, уячин эрдмтә болсмн. Эн олн зүсн ке-сәәхн хувц уйҗ, һурвн үрән болн элгн-садан хувцлдг бәәсмн. Ода хая нег сул цаг учрхла күүкд күн тааста эрдмәрн үүл бәрнә. Зурһан медәтнртән одад, гер-бүүрин кергинь күцәһәд, Зинаида Санджиевна сад-һарудан ахулҗ, олн зүсн темс болн зер-земш урһахдан дурта. Хураҗ авсн урһцан эд-бод кеһәд, үвлд белднә.

ДООҖАН Наталья