Юристнриг йөрәв

Шидр Элстд юристин сән Өдрт нерәдсн байрин хург болв. Эн халхин ветеранмуд, зарһсин, зөв-йос харлһна бүрдәцсин көдләчнр, Б.Б.Городовиковин нертә заллтын болн зөвин дацңгин багшнр, оютнр болн күндтә гиичнр Хальмгин залврин бәәрнд цуглрв.
Хальмг Таңһчин Толһач Хаска Батун йөрәлин үгиг энүнә һардврин ахлачин дарук Тарбан Савар умшҗ олнд соңсулв.
«Өдр болһн олн халхар орҗ ирсн сурврмудт хәрүһинь олҗ, чинртә төрмүд хаһллһнд орлцҗ йовнат. Эндр бүрдәц болһнд юрист кергтә болна. Халхин ветеранмудт онц ханлтан өргҗәнәв. Тадна үлгүрәр өдгә цагт көдлҗәдг мергҗлтнр кергән даавртаһар күцәҗәнә», гиҗ таңһчин Толһачин йөрәлд келгдв.
Тогтсн авъясар байрин хургин йовудт «Җилин юрист» мөрән дииләчнрин нерд заагдв, тер мет ончрсн улсиг Күндллһнә талдан темдгүдәр ачлв. Әрәсән юристнрин бүрдәцин хальмг әңгин ахлач Анастасия Кравцова, эн бүрдәцин күцәгч һардач Чимдә Эрднь болн Хальмгин залврин бүртклһнә-зөвин заллтын һардач Очра Виктория Хальмг Таңһчин ачта юристан нер зүүв. Анастасия Кравцован келсәр, юристнриг Төрскндән церглҗәдг улсла әдлцүлҗ болхмн.
Таңһчин Улсин Хуралын (Парламентин) Ахлач Артем Михайлов олна йөрәлин үгд багтад, эн җилд Әрәсән юристнрин бүрдәц хөрн җилин өөнән темдглҗәхиг тодлулв.
Керг-үүлдврин йовудт Әрәсән юристнрин бүрдәцин ханьд шин мергҗлтнриг орулҗ авв, күн болһнднь ирлцңгү бәрмт цаасн бәрүлҗ өггдв.
Тер мет бар сарин 5-д темдглгддг волонтермудын сән Өдрлә ирлцҗ, кесгнь «Бидн хамдан» гидг мөрәһәр ачлгдсн болдг.
Хальмгин нертә артистнр болн «Бумбин орн», «Олимп», «Веснушки», «Алтн» коллективс билг-эрдмән нерәдҗ, байр-бахмҗ үүдәв.
Байрин хургин чилгчәр Әрәсән юристнрин бүрдәцин хальмг әңгин ахлач Анастасия Кравцова юридическ Цугәрәсән диктант йисдгч кемдән эклсиг зәңглв. Диктант һурвн әңгд хувагдна, терүнд 33 сурврт хәрү өгх кергтә. Орлцач болһн сертификат авна, тенд зөвин туск медрлнь заагдна. Терүнә ашар цааранднь иргнмүдин төлә зөвин халхар гегән-герлин ямр керг-үүлдврмүд давулхиг медәд, ирлцңгү зура тогтагдхмн.
КАРСАНА Евгения