Насан авдг йосрхл

Хальмг Таңһчин улс Зулын байрт белдвр кеҗәнә. Эн өдрмүдт әмтн олар хурлд ирҗәхиг үзҗ болхмн. Җилиг ашлдг эн байрт белдсн цагтан ах үйин улсин санлыг тевчҗ, аав-ээҗнртән, өөрхн элгн-садндан йөрәл авхулхар әмтн хурлд ирнә.
Шишлң мөргүлд орад, шаҗна йосрхлар күцәгдх тоотыг күцәчкәд, әмтн адһм угаһар Бурхн Багштан болн нань чигн бурхдт мөргәд, кесгтән тарҗ йовлго, цә ууһад, боорцгар тоогдад, бурхн-шаҗна евәлд багтҗ, хурлын мөргүлин хорад амрад, сууһад, седкл төвкнүн хәрнә.
Насан утдуллһна мөргүлмүдт чигн әмтн өрк-бүләрн, күүкдән дахулҗ ирҗ орлцҗахинь үзхд байрта. Тиигәд нег кемд миңһәд хальмгудан үзнә гисн басл омгта йовдл мөн. Балһсна зах болһнас автобусар, нань чигн көлгн-күчәр хурлур темцҗ ирсн әмтн Цаһан Аавдан мөргәд, хурлын эргндк күрдиг эргүләд, зальврад, Бурхн Багшин Алтн сүмдән орҗ йовхинь үзхд, теднә то йир олн болҗахнь нег үлү седклд тааста болна.
Өвкнриннь санлыг тевчәд, җилин туршарт учрсн тоотан ухалҗ, иргчдән кех тоотан темдглҗ авсн әмтнә герлтсн чирә тер кемд үзнә гисн басл байрта. Иргч җилд бурхн-шаҗна евәлд багтҗ бәәхәр, харш болх тоотыг уурулҗах мөргүлд орад, әмтн җирһлин хаалһан цааранднь делгрүлнә.
Эн җил Зул бар сарин 14 -д темдглгдҗәнә.
Бурхн Багшин Алтн сүмд болх байрин мөргүл хойр кемәр болхмн. Зулын мөргүлин түрүн әңгнь өрүн 9 часас авн 11:30 күртл болхмн. Дарунь завср зарлгдҗ, әмтн цә ууһад, боорцгар тоогдад, зулла нег-негән йөрәхмн.
Үдин хөөн мөргүлин хойрдгч кем болхмн. Тернь 14:00 часас авн 15:30 күртл гелңгүд ном умшхмн. Багшнрин ачинь хәрүлх «Лама Чопа» гидг йосрхлд цуглрҗ ирсн әмтн орлцхмн.
Зулла кегддг цуг авъясмуд эн өдр күцәгдхмн. Бурхн Багшин Алтн сүмән ном умшҗ эргҗ йовдг йосрхлд әмтн орлцхмн. Олн зул эн өдр өрггдхнь маһд уга.
УШКАНА Сувсн