Нег ормдан көдләд үлгүр болна

Тааста эрдмәрн олн җилдән нег ормд көдләд олн дунд ик күндллһ болн тоомср олсн улс ода ховр. Баһ цагтан эгл көдләчәр экләд, байн дамшлт хоршаҗ, өөдән мергҗлттә болад, күч-көлснә хаалһан эклҗәдг баһчудт үлгүр болдг улсин тускар эрк биш бичҗ олнд медүлх кергтә гиҗ сангдна. Одахн мана редакцур медәт Басана Александр орҗ ирәд, Баһ Дөрвдә района электрокүчәр тетклһнә бүрдәцд (РЭС) тәвн җилдән Виктор Мацакович Ванькаев көдлҗәхин тускар хувалцад, терүнә тускар цөөкн бүлән үг бичхиг сурв.

Баһ Дөрвдә РЭС-ин ах инженер Бакан Муутлын келсәр, дигтә эн сарин эклцәр Виктор Мацакович эн бүрдәцд күч-көлснә хаалһан эклснә 50 җилин өөн болв. Тер цагт районд электрокүчәр тетклһнә әңг бәәсмн, баахн Виктор Ханата селәнд үүлддг «Цаһан толһан әңгд» электрик болҗ экләд көдлв. Көдлн бәәҗ эн Рязанск мүҗд Скопинск электротехническ училищд сурад, мергҗлтән өөдлүлв. Эндр Ванькан Виктор селәнд бәәдг әңгиг һардна, энүнлә хамдан тавн күн көдлнә. Авальнь Галина Михайловна эрдмәрн лавкч болна, эн селәнә лавкд урднь көдлдг бәәсмн. Дөчн җил хооран эн авалиннь һардврт көдлдг болв, тер цагас авн эн бас байн дамшлт хоршаһад, кергән сәәнәр меддг мергҗлт болад төлҗв. Галина Михайловна ямр нег эвдрлт учрсн цагт әмтнәс орҗ ирсн эрлһсиг диглнә, хам-хоша бәәдг селәдиг электрокүчәр тетклһиг бүртклһн бас энүнә даавр болна. Овадыка Валерий эн әңгд бас дөчн җилдән көдлҗәнә. Хөрн һар җилдән энд көдлҗәдг Устан Валерий бас дамшлтта көдләч болна. Олн җилдән көдлҗәдг мергҗллтнр баһ наста көдләчнр Гадян Олегд болн Бадмин Мергнд цугинь зааҗ дасхна. Иим байн дамшллта болн эрдмдән итклтә ах үүрмүдәс баһчуд үлгүр авч, эдниг дахҗ көдлмшән сәәнәр болн үнн кевәр күцәхәр шунна.
- Виктор Мацакович көдлмштән ик дааврта, цугинь дигтә-даратаһар күцәдг, тохнята күн. Эгл көдлмшч болҗ эклҗ көдләд, эндр эн Ханата, Унһн Төөрәч болн Зурһан селәдиг болн малын хошмудыг электрокүчәр теткҗәдг әңгиг һардҗана. Тәвн җилдән нег ормдан көдләд, шишлң сурһуль сурад, мергҗлтән өөдлүлҗ, эндр маднла байн дамшлтарн хувалцҗ йовхнь бахмҗта. Хамдан көдлҗәдг үүрмүднь Виктор Мацаковичиг күндлҗ тевчнә, ямр нег төрәр сүв-севлгинь болн ухан-тоолвринь медҗ авхар шунна. Мана района бүрдәцд иим мергҗлтнр көдлҗәхнь көдлмшән өөдән кемҗәнд күцәхд туслна, – гиҗ Бакан Муутл темдглв.
«Цаһан толһан әңгд» көдлмшән үнн-чик седклтәһәр күцәдг улсин ач-тусар эднә медлд ордг селәдин әмтн болн малчнр электрокүчәр сәәнәр теткгдҗәнә. Теңгрин аюлас иштә эс гиҗ нань талдан учрар шам уга үлдсн цагт эдн дарунь ясврин көдлмшиг кеһәд, эвдрсн тоотынь ясна. Шишлң көлгн-күчн кергтә болхла, Баһ Дөрвдә РЭС терүг йилһҗ өгнә. Ханата, Унһн Төрәчи болн Зурһан селәдин уульнцст шам углҗ тәвлһнә көдлмш кегдв, тегәд бәәрн улст асхнднь әәмшг угаһар йовхд сән таал тогтагдсн бәәнә.
Тааста көдлмш бәәхлә, өрк-бүлнь итклтә түшг болхла күн бийән кишгтәд тоолҗ чадҗана гиҗ тоолгдна. Олн җилдән үнн-чик седклтәһәр нег ормд көдлҗәдг Ванькан Виктор мел тиим күн болҗахнь лавта. Галина Михайловна авальтаһан эдн ирх җилд алтн хүрмән темдглхмн. Хамдан нег класст сурч йовсн төләдән эдн баһ цагасн авн нег-негән меднә, эн җилмүдин эргцд кен негнәннь седклд орҗ, ниитә бәәнә. Эдн дөрвн көвүһән өскәд, цугтаднь чик сурһмҗ өгв. Очр, Церн, Санл болн Савр көвүднь күн болад, тааста эрдмәрн көдлҗ йовна. Келхд, Санл эцкән дахад селәнә әңгд эклҗ көдләд, Виктор Мацаковичин һардврт дамшлт хоршасмн. Ода Ванькан Санл района электрокүчәр тетклһнә бүрдәцд көдлҗ, эцкиннь нериг өөдән бәрҗ йовна.
Селән һазрт бәәдг улсин көдлмш җилин дөрвн цагт чилхш. Малан асрх, герән болн хаша-хаацан ясх, сад-һарудан услҗ ахулх кергтә. Виктор Мацакович болн Галина Михайловна гертән мал бәрнә, тегәд эдн эврә үстә, тоста, махта бәәнә. Сул цаг учрхла эдн сад-һарудтан көдлҗ, олн зүсн зер-земш болн темс урһана. Эднә герин һаза альмн, кедмн, хар өрг болн нань чигн талдан модд урһна. Намртнь цуглулсн урһцан эдн эд-бод кеҗ, үвлд белднә. Күүкд күүнә суулһсн цецгүд эднәһүр ирсн улсиг байрлулҗ бахмҗ үүдәнә. Арвн хойр ачнь ээҗдән гиичлҗ ирхдән дурта. Аавнь болн ээҗнь нег ормдан олн җилдән көдләд тоомсрта улс болдгнь олн ачнртнь сән үлгүр-үзмҗ болна. Эднә өрк-бүлин авъясиг кен негнь өсәд цааранднь делгрүлх чигн биз.

ДООҖАН Наталья
ЗУРГТ: Баһ Дөрвдә РЭС-ин «Цаһан толһан әңгин» көдләчнр Устан Валерий, Ванькан Галина болн
Виктор, Овадыка Валерий