Эзн уга һазрин тускар

Шидр Әрәсән Федерацин Хүүвин хазна болн финансин рынкин комитетин седвәрәр болсн селвлцәнд эзн уга һазриг шаңһа болн муниципалитетмүдин медлд орулҗ авлһна төр босхгдв. Ниигмин сүлҗәнә эв-арһар болсн селвлцәнд Хальмг Таңһчин Улсин Хуралын (Парламентин) депутат Кокан Михаил орлцв.
2021 җилд Әрәсән Тооцана палат кесн то-дигәр, мана орн-нутгт негдсн шаңһа тоод (ЕГРН) эзн уга һазрин 700 әңг тоод авгдсн билә. Тедниг муниципальн медлд орулсн цагт региона хазнд немр 12 җува арслң немгдхмн. Тер мөңгиг социальн төрмүдт эс гиҗ мөңгнә халхиин төсвс күцәлһнд олзлҗ болхмн. Эзн уга һазриг бүрткәд, селәдин болн балһсдын делгрлтд тустаһар олзлх кергтә гиҗ селвлцәнд келгдв. Харм төрхд, удан цагт эзн уга бәәдг һазриг тоод авлһна эв-арһ уга болад, эн төр хаһлгдҗахш. Терүг белдәд, орн-нутгт һазрин көрңгиг шинҗләд, тоод авх кергтә гисн шиидвр селвлцәнд батлгдв.
Дааврта бүрдәцс хоорндан нөкцҗ үүлдәд, шишлң көдлмшч баг бүрдәһәд, орн-нутгт болн регионмудт эн төр хаһлх зөвтә болв. Эзн уга һазриг тоод авлһна диг-дараг тогталһна төр бас хаһлгдх болҗ һарв.
- Орн-нутгт тогтсн нәрн бәәдлиг шинҗләд, эзн уга һазриг тоод авч орутаһар олзллһна сән гисн дамшлтыг тархалһна туст шиидвр авгдв. Юңгад гихлә тер дамшлт мана орн-нутгт эн чинртә төр хаһлхд туслх,- гиҗ депутат Кокан Михаил келв.
Әрәсән Федерацин гешүдин болн региона зака үүдәгч хургудын депутатнрин седвәр эзн уга һазриг тоод авч, терүг олзта-тустаһар олзлҗ бәәрн хазна оруһин әңг икдүлхмн.
БАТАН Сәәхлә