Шин трактормуд хулдгдхмн

Элстд Минск тракторн заводын әңг тосхлһн төгсхдән өөрдҗ йовна. Тенд ясврин төв, көлгнә зи хадһлдг бәәрн болн зун трактор багтамҗта талвң көдлхмн. Эн төв секгдәд нег һазра фермермүдт бәәтхә Өмн үзгин дуһргин селәнә эдл-ахун көдләчнрин төлә туста болхнь лавта.
Тодлхд, 2023 җилд Хальмг Таңһчин Толһач Хаска Бату Беларусь Республикин президент Александр Лукашенкола харһад күүндсн йовудт нөкцлтхәр үгцсн билә. Тер мет селәнә эдл-ахун төр бас хаһлгдв. Хөөннь Хаска Бату болн «Минск тракторн завод» ОАО-н һардвр нөкцлтин бооца батлсн болдг. Нертә заводын дилерск төв секлһн Хальмгин болн Беларусин хоорндк залһлдаг улм батруллһнд туслхмн. Терүнәс нань таңһчин селәнә эдл-ахун халх делгрүллһнд тусан бас күргхмн.
– Беларусин үүрмүдлә нөкцлтҗ, таңһчин селәнә эдл-ахун халхин техникин улынь шинрүлҗ, тер мет мал өсклһнә делгрлтд туслхмн гиҗ келх кергтә, – гиҗ Хальмгин селәнә эдл-ахун министр Гаван Тимур темдглв.
Шидр байрта зәңг ирв. Гаван Тимур бүрдәцин һардврла үгцсн ашт Зулын болн Шин җилин байрин өмн өргнд 2026 җилин туула сарин 31 күртл МТЗ тамһта шишлң техникиг невчк кимдәр хулдҗ авч болна. Дундлад келхлә хулдгдҗадг үн 15 процентд хасгдад, 300 миңһн шаху арслңд баһрхмн.

ОЛЬДАН Цаһан