Шаңһа дөңгәр эврә керг бүрдәв

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр эн җилин эклцәс авн мана таңһчд 644 социальн бооцан батлгдв. Терүг батлсн улс дундас 166 күн көдлмш олҗ авв, 294 күн социальн бооца батлад, арһлач болҗ үүлдв, дәкәд 113 күн онц эдл-аху бүрдәв. Социальн бооца батлсн улст җирһлин күнд таалас һарад, олз-оруһан икдүлхд шаңһас 144 сай арслң йилһгдв.
Шаңһа көтлврт орлцад, социальн бооца батлсн улс дунд Яшалта селәнә бәәрн күн Лидия Козелкова бәәнә. Күүкд күн иим көтлвр бәәхин тускар соңсад, сад-һарудт кергтә эд-таврин лавк секхәр шиидв. Эврә керг бүрдәхин төлә энүнд мөңгн уга билә, тегәд шаңһа дөң энүнд санаһан күцәхд туслв. Яшалтан района әмтнә социальн харслтын әңгин дөңгәр эн кергтә бәрмт цаас цуглулад, 350 миңһн арслңга дем авв. Көтлврин йовудт йилһгдсн мөңгәр күүкд күн лавкин үүлдврт кергтә кергсл болн эд-тавр хулдҗ авв. Шидр Лидия Козелкован лавк байрин бәәдлд секгдв. Бәәрн улс нааран ирҗ, сад-һарудт олзлгддг болн герин мал асрлһнд кергтә эд-тавр хулдҗ авна.
БАТАН Сәәхлә