Эрмдгтә бичкдүдт белг илгәв

Мана таңһч болн Луганск Улсин Республикин Антрацитовск район хоорнд батлгдсн бооцана медлд Хальмг Таңһчин социальн делгрлтин, күч-көлснә болн көдлмшәр тетклһнә министерств аһу ик көдлмш күцәҗәнә. Тиигәд, министерствин болн терүнә медлд үүлддг бүрдәцс дамшлтарн хувалцҗ, Антрацитовск района әмтнә социальн теткврин комплексн төвин (КЦСОН) үүлдврт шунмһаһар орлцна. Одахн министерствин көдләчнр төвин гемтә-шалтгта бичкдүдин социальн реабилитацин әңгд өңгтә телевизор белглв.
- Бидн Антрацитовск района КЦСОН-а көдләчнрт баһ тетквртә, олн үртә өрк-бүлмүдин, гемтә-шалтгта улсин социальн теткврин төрмүд хаһлхд дөң күргҗ хамцу үүлдҗәнәвидн. Тер мет бидн социальн бүрдәцин материальн-техническ ул батруллһна, өдгә цага кергсләр тетклһнә төрт орлцнавидн. Мана белг гемин уршгар гертәсн һарч чаддго эрмдгтә улст ниигмин сүлҗәнә эв-арһар олн зүсн керг-үүлдвр бүрдәлһнд олзлгдх гиҗ ицҗәнәвидн. Бидн цааранднь чигн төвин көдләчнриг дөңнхвидн, - гиҗ Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина келв.
Антрацитовск әмтнә социальн теткврин комплексн төвд гемтә-шалтгта 191 бөдүн күн болн 45 бичкн хәләврт бәәнә. КЦСОН-а һардач Наталья Кириллова Хальмг Таңһчд бәәдг үүрмүдтән ик ханлт өргҗ, эднә дөң баһ тетквртә, эрмдгтә улст өөдән чинртә социальн туслмҗ күргхд туслна.
БАТАН Сәәхлә