Хазна туск закан батлгдв

Давсн долан хонгин чилгчәр Хальмг Таңһчин Улсин Хуралын (Парламентин) дарани сессь болв. Терүнд долан төр хәләгдв. Чинртә төрмүд дунд эн җилин болн иргч һурвн җилмүдин таңһчин хазна закана төсв болв. Сүүриг таңһчин Улсин Хуралын Ахлач Артем Михайлов һардҗ давулад, депутатнриг Әрәсән Һол Бичгин сән өдрлә йөрәв.
Эн җилин болн зураллһна кемин 2026-2027 җилмүдин таңһчин хазна туск заканд сольвр оруллһна тускар Хальмг Таңһчин залврин Ахлачин негдгч дарук – таңһчин финансин министр Шурһчин Очр зәңгллһ кев. Дааврта һардачин келсәр, алвна болн алвна биш ору икдснә ашт эн җилин хазна заканд сольвр орулх кергтә. Тиигәд, таңһчин хазна оруһин әңгд 1 җува 512 сай арслң орулгдв. Тер мет орн-нутгин хазнас мана таңһчд мөңгн йилһгдснәс иштә сольвриг эрк биш батлх кергтә. Депутатнр эн төриг нег дууһарн дөңнәд, закана төсвиг батлв.
Ирх һурвн җилин хазна туск закана төсв хойрдгч умшлһндан хәләгдв. Орн-нутгин хазнас йилһгдх мөңгиг болн эврә оруг тоолад ирх һурвн җилд ямаран керг-үүлдврмүдт кедү мөңгн йилһгдхин тускар Шурһчин Очр тодрхаһар келҗ өгв. Тиигәд, мана таңһч ирх җилд шаңһа 23 көтлврт болн келн-улсин 9 төсвд орлцхмн. Авъяст тохрсар, таңһчин хазна өрәлнь социальн төрмүдт һарһгдхмн, тегәд җалв өөдлүллһн, демин мөңг өглһнд ик оньг өггдҗәнә. Ирх һурвн җилин эргцд селән һазрт көдлх мергҗлтнриг дөңнхмн гиҗ зуралгдҗана. Тиигәд, «Земск эмч» болн «Земск багш» гидг көтлврмүдт орлцсн улсиг дөңнсн деерән селән һазрт көдлх сойлын көдләчнриг болн дамшачнриг бас урмдулхмн. Тер мет баахн багшнрт, сурһмҗлачнрт болн номтнрт нег дәкҗ өгдг демин мөңгнә кемҗән икдүлгдхмн. Таңһчин сурһуль-эрдмин бүрдәцст бат ясвр келһнә көдлмш цааранднь күцәгдхмн, шин сурһуль тосхгдхмн. Ирх җилд спортын бүрдәцст бат ясвр келһнә төр экләд хаһлгдхмн. Тиигәд, Т.Балдашиновин нертә бөк бәрлдәнә академьд бат ясвр кегдхмн, Троицкое болн Яшкуль селәдт ФОК тосхгдхмн. Селәдт дегтрмүдин саңгудт, эмнлһст бас сән таал тогталһна төр хаһлгдх. Хуучн гермүдәс әмтиг нүүлһҗ авлһна, өнчн бичкдүдиг гер-бүүрәр тетклһнә, олн патьрта гермүдт ясвр келһнә төрт бас мөңгн йилһгдхмн. Таңһчин муниципальн бүрдәцсиг дөңнлһнд бас хазна һаруһин әңгд мөңгн батлгдв. Финансин министрин келсәр, ирх җилд таңһчин хазна оруһин әңг 35443,6 сай арслң, һаруһин әңг болхла 35325,9 сай арслң болхмн гиҗ зуралгдҗана. Депутатнр соньмсулҗадг төрмүдәр сурвр өгснә хөөн ирх һурвн җилин хазна туск закаг батлв.
Дарунь депутатнр эрк биш медицинск даатхлһна таңһчин әңгин хазна туск закана төсв хәләв. Эн төрәр ТФОМС-ин һардач Ванькан Гилән зәңгллһ кеһәд, депутатнриг соньмсулҗадг төрмүдәр хәрү өгв. Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина болн таңһчин эрүл-менд харлһна министр Саран Булат күүндврт орлцад, зәрм төрмүдәр цәәлһвр өгв. Ирх җилд эрк биш медицинск даатхлһна саңгин хазна оруһин әңг 5720579 миңһн арслң болхмн гиҗ зуралгдҗана. Депутатнр закана төсвиг бас нег дууһарн дөңнв.
Хальмг Таңһчин Улсин Хуралын (Парламентин) һаруһин, орн-нутгин закадыг дөңнлһнә туск төрмүд бас хәләҗ батлв. Сүүрин чилгчәр депутатнр зәрм төрмүдәр седвәр татв, сүв-селвг орулв. Хальмг Таңһчин Улсин Хуралын Ахлач Артем Михайлов сүүрт хәләгдсн төрмүдиг ашлад, Зулын байрла депутатнриг йөрәв.

ДООҖАН Наталья