Үвлд сәәнәр белдв

Хальмгин эдл-ахус үвлзлһнд сәәнәр белдв. Энүнә тускар шидр селәнә эдл-ахун министерствд зәңглв. 2025-2026 җилмүдт мана таңһчд 297,8 миңһн толһа бод мал, 1410,7 миңһн хөн, 8,4 миңһн мөрн болн 658 һар темән үвлзҗәнә.

Малын хот 102 процентд белн бәәнә. Керглгдҗәдг 400,3 миңһнәс 414,2 миңһн тонн хот белдгдв. Тер мет үвлин цагиг сәәнәр давулхин төлә 270 шишлң техник белн бәәнә, тер тоод цас хурадг көлгн белдгдсмн.
– Эн өдрмүдт ик киитн уга болад таңһчин эдл-ахуст фермермүд көдлмшән амр таалд күцәҗәнә гиҗ келх кергтә. Селәнә эдл-ахун министерствин мергҗлтнр хошмудар йовҗ, үвлзлһн яһҗ давҗахинь бүрткҗ хәләнә. Үвлән сәәнәр давулад, хавртан сән төл авхар малчнр зуралҗана, – гиҗ селәнә эдл-ахун министр Гаван Тимур темдглв.
Тер мет Хальмг Таңһчин селәнә эдл-ахун министерствд услврин һазрин төриг цааранднь күцәҗәнә. Тер мет малын хотын кемҗәг икдүлхәр зүткчәнә.
Тодлхд, нидн малын хот кеҗ һарһлһна төсв экләд күцәгдв. Терүнә йовудт 2030 җил күртл 17 миңһн аһу гектар услврин һазриг селәнә эдл-ахун эдлврт орулхар зуралв. 2024 җилд услврин һазр 18,6 миңһн аһу гектар тогтав, эн җил болхла эн кемҗән икдв.

ОЛЬДАН Цаһан