Делгә Эрднин медальмүдәр ачлв

Цергә шишлң керг-үүлдвр давҗадг һазрур мана таңһчин һардвр, арһлачнр, эгл улс чигн дөң-тусан даңгин күргнә. Дулан хувцн, махна зүүтә хот-хол, цергә шишлң кергсл болн талдан керглгдҗәдг тоот тиигәрән йовулгдна.
Бар сарин 15-д Зулын байр угтад, Хальмгин Толһачин һардврин ахлач Кирилл Поповин һардврт мана таңһчин делегац Луганск Улсин Республикин Антрацит балһснд одв.
Делегацин ханьд Яшкулин района толһач Эдгән Бора болн Хулхтын СМО-н толһач Гүнзикә Бадм орв. Кирилл Попов таңһчин Толһачин йөрәлин бичг олнд соңсулҗ умшад, цергә шишлң керг-үүлдврт нег һазра зурһан орлцачд Делгә Эрднин медальмүд бәрүлҗ өгв. Хальмг улсас түрүн болҗ Советин Союзин өөдән чинртә Баатрин нер зүүсн Делгә Эрднь олна төлә үлгүр-бахмҗ болна. Эн медаль залу-зөргәрн ончрсн улст өггднә. Өдгә цагт нег һазра мана дәәчнр әмән әрвллго, Төрскән харсч йовна. Зулын байр угтҗ, эн ачлвр цергчнрт өггдснь олнд темдгтә болв. Яшкулин района муниципальн бүрдәцин толһач Эдгән Бора бас цергчнриг йөрәһәд, һартан буута, орн-нутгин олн келн-улсин талдан элчнрлә хамдан, йилһл уга ахнр-дүүнр мет Төрскән харсчахинь онц темдглв.
Тогтсн авъясар буйнч седклтә нег һазра улс хөөнә мах, һуйрин зүүтә болн талдан сенр хот-хол, дулан хувц илгәсн болдг. Цергчнр нег һазра улстан ик ханлтан өргәд, диилвр делдҗ, гертән әмд-менд ирхән иткүлв.
Темдглхд, цергчнрлә харһсн кемд протоиерей Анатолий болн Шерап Дорҗ лам ирлцңгү мөргүл давулв. Цуһар бурхнд мөргәд, ном соңсад, шулун Диилвр делдхин төлә дотран зальврв. Таңһчин нертә артистнр цергчнриг бас йөрәһәд, Зулын байрт нерәдсн концерт белглв.

КАРСАНА Евгения