Бәәрн әңгүдин үүлдвриг делгрүлхәр

Урҗ өдр Элстд «Негдсн Әрәсә» партин Хальмг Таңһчд үүлддг әңгин хург болв. Терүг партин региональн әңгин сегләтр, Хальмг Таңһчин Толһач Хаска Бату нүр үгәр секәд, шидр Москва балһснд Әрәсән Президент Владимир Путин «Негдсн Әрәсә» партин һоллгч Хүүвин сегләтр Владимир Якушевла харһсна тускар келв. Тер харһлтд босхгдсн чинртә төрмүдин тускар бидн бас күүндҗ, кеҗ-күцәсн көдлмшин аш диглҗ, иргч зуран чухл зөрүллтс диглҗ авх зөвтәвидн, гиҗ Хаска Бату темдглв.

- Орн-нутгин толһачин темдглсәр, цергә шишлң керг-үүлдврин ветеранмуд суңһврт шунмһаһар орлцҗ, дааврта үүлд батлгдҗ йосна бүрдәцст олзта-тустаһар көдлхиг дөңнх кергтә. Цергчнр Төрскән харсад, залу-зөрмгән үзүлсн улс мөн, тегәд бидн тедниг күндлҗ итклән медүлх зөвтәвидн. Одахн мана нег һазра цергч Очр-Һәрән Наран Әрәсән Президентд күцәсн даалһвриннь тускар келхләрн, энүнә һардврт бәәх дәәчнр залу-зөрмгән үзүләд, седвәрән һарһад, өвәрц эв-арһ олзлҗ хортыг күүчснә тускар хувалцв. Тегәд күнд бәәдлд эв-дован һарһад, зөрмгән медүлсн мана нег һазра күүнә баатр йовдл ик бахмҗ үүдәнә. Орн-нутг эднә зөрмгиг эрк биш темдглх. Иим улс мана ик орн-нутгин иргчиг залх зөвтә. Эн җил мана орн-нутгт болсн Төрскән харсачин җилд давулгдсн муниципальн суңһврт СВО-н ветеранмуд орлцҗ, партин нерн деерәс бәәрн залврин бүрдәцсин депутатнрт суңһгдв. Тиигәд, 14 ветеран ода муниципальн хургудын депутатнр болҗ үүлдҗәнә. Эдн цергә керг-үүлдврт орлцачнрин болн эднә өрк-бүлмүдин төрмүд хаһллһнд эрк биш тәвцән орулх. СВО-н ветеранмудын Ниицәнә ахлач Чумуда Николайд онц ханлтан өргҗәнәв, тадн олна көдлмшиг күцәмҗтәһәр күцәҗәнәт. Тер мет эн хургт орлцҗадг Приютна района депутатнрин Хургин депутат Александр Онежкод бас күндллһән медүлҗ, онц келхәр седләв. Эн «Герои 08» көтлврт орлцҗана, төрскн һазриннь делгрлтд тәвцән орулхар шунҗана, бидн таниг цуг халхар дөңнхвидн, – гиҗ Бату Сергеевич келв.
Таңһчд үүлддг региональн әңгин үүлдврин аш диглҗ, улсин көтлврин йовудт СВО-н ветеранмудыг болн эднә өрк-бүлмүдиг дөңнлһнә, сурһуль-эрдмин болн эмнлһнә бүрдәцст бат ясвр келһнә, усар тетклһнә төрмүд күцәмҗтәһәр хаһлгдсиг Хаска Бату бас темдглв. Эн җил партин шиидврәр муниципальн депутатнрин җил билә. Мана таңһчд түрүн болҗ муниципальн депутатнрин ик хург болв. Одахн болсн партин Генеральн Хүүвин хургт ирх җилд бәәрн әңгүдин җил давулх шиидвр авгдв, тегәд селәдт болн райодт үүлддг әңгүдин үүлдвриг ясрулҗ шинрүлх кергтә гиҗ Хаска Бату хувалцв. Партин улсин көтлврин йовудт Сарпан района Уманцево селәнд «Беседка добра и уважения» гидг төсв күцәгдҗ, орн-нутгт диилвр бәрв. Бату Сергеевич района толһач Манҗин Басңд, Уманцево селәнә толһач Михаил Андреевд болн селәнә бәәрн әңгин ахлач Наталья Танаевад таңһчин нериг өөдән бәрснд ханлтан өргв. Партин региональн әңгин президиумин гешүн Олег Северцев «Публичная политика» марһана хойр девсңд диилвр бәрсиг бас темдглв. Элстд, Лаганьд болн Приютное селәнд үүлдҗәдг ШОП-ин үүлдвриг таңһчин толһач бас темдгләд, терүнд әмтн цуглрҗ олн зүсн керг-үүлдвр давулдгиг буульв. Бәәрн әңгүдин гешүд бәәрн әмтнә төрмүдиг сәәнәр меднә, тегәд теднә чинриг өөдлүлҗ, үүлдвринь батруллһнд ик оньг ирх җилд өггдхмн гиҗ Хаска Бату келв.
- Эн җил мана таңһчд аһу ик көдлмш күцәгдв, нарт-делкән чинртә керг-үүлдврмүд болв, бидн арһ-чидлән негдүләд, ямаран чигн төрмүдиг хаһлҗ чадхан медүлвидн. Тиигәд, Әрәсән Президент Владимир Путинә даалһврар бурхн-шаҗна нарт-делкән ик хург давулад, мана орн-нутгин күчиг батруллһнд тәвцән орулвидн. Ик хургт орлцхар 7 миңһн гиич олн һазрас ирв, Әрәсәд түрүн болҗ Бурхн Багшин әрүн тоот авч ирҗ, терүнд 100 миңһн күн мөргв. Мана таңһчин хотл Элст балһсн 160 җилин өөнән темдглв. Бидн эн ончта керг-үүлдврмүдт белдҗ балһсан кеерүлҗ, сән кец-таал тогталһна кесг төсв күцәввидн. Басан Городовиковин нертә Хальмг ик сурһуль 55 җилин өөнән темдглв. Мана ик сурһуль дөрвн җил дарандан «Приоритет-2030» көтлврт орлцҗана. Эн җил мана орн-нутг Алдр Диилврин 80 җилин өөниг өргмҗтәһәр темдглв. Мана ачта ветеран Петр Леонтьевич Леонтьев эн намрар 100 җилин өөндән күрв. Мана таңһчин хазна оруһин әңг эн җил 5 җува арслң өсв, эннь ниднәкәс 20 процентд ик болв. Таңһчин социальн-экономическ делгрлтин онц көтлврин йовудт 2019-2024 җилмүдт бас аһу ик чинртә төрмүд хаһлгдв, ода эн көтлврин хойрдгч девсң батлгдв. 2030 җил күртл онц көтлврин йовудт таңһчин инвестиционн таал ясруллһна көдлмш күцәгдхмн. Мана таңһчин күцәмҗиг үнләд, орн-нутгин хазнас 2029 җил күртл 5 җува арслң йилһгдхмн, – гиҗ Бату Сергеевич кеҗ-күцәсн көдлмшин тускар келҗ тооцаһан өгв.
Дарунь партин региональн әңгин хургт орлцачнр КРО-н политсоветин болн президиумин зәрм гешүдиг һарһад, шин гешүдиг батлв. Тиигәд, Әрәсән Федерацин Хүүвин гешүн Хачира Борис, Хальмг Таңһчин залврин Ахлач Босхмҗин Гилән, Яшалтан района толһач Шаран Пүрвә болн Элстин бәәрн әңгин 1-ч әңгин сегләтр Оника Алевтина партин региональн әңгин политическ Хүүвин гешүдт нег дууһарн суңһгдв. Әрәсән Федерацин Хүүвин гешүн Хачира Борис болн Хальмг Таңһчин залврин Ахлач Босхмҗин Гилән партин региональн әңгин президиумд орхиг хургин делегатнр нуувчар дууһан өгәд дөңнв. Борис Бекмуратович болн Гилән Герасимовна хургт орлцачнрт ханлтан өргәд, эднә даавриг үнн кевәр күцәҗ үүлдх үгән өгв. Хургт партин гешүдин иткл цаас бәрүлҗ өглһнә байрта керг-үүлдвр болв. «Негдсн Әрәсә» партин региональн әңгин сегләтр, Хальмг Таңһчин Толһач Хаска Бату партин зергләнд орсн улсиг йөрәһәд, төрскн һазриннь делгрлтд тәвцән орулҗ күцәмҗтәһәр үүлдхиг дурдв.
ДООҖАН Наталья