Селәнә арһлачнриг дөңнх күслтәһәр

Давсн долан хонгин чилгчәр Хальмг Таңһчин Улсин Хуралын (Парламентин) дарани биш сессь болв.Терүнд дөрвн төр хәләгдв. Сүүриг таңһчин Улсин Хуралын Ахлач Артем Михайлов һардҗ давулв.

Орн-нутгин заканла ирлцүлхин төлә «О патентной системе налогообложения» гидг таңһчин заканд сольвр орулх кергтә гиҗ Хальмг Таңһчин залврин Ахлачин негдгч дарук – таңһчин финансин министр Шурһчин Очр зәңглв. Тиигәд, эн сольвр селән һазрт үүлддг арһлачнриг урмдулх зөвтә гиҗ дааврта һардач цәәлһв. Депутатнр закана төсвиг дөңнәд, сольвр орулхиг батлв.
Дарунь Хальмг Таңһчин Олна палатын ахлач Мучан Батыр һурвн җилин үүлдврин аш диглҗ, ямаран керг-үүлдврмүд күцәснә тускар келв. Олна бүрдәцин ахлачин келсәр, эн җилмүдин эргцд эдн суңһвр давуллһнд олна шинҗләчнриг белдв, таңһчин болн орн-нутгин олна бәәдл-җирһлд шунмһаһар орлцв. Талдан регионмудын Олна палатмудла нөкцҗ үүлдхин төлә бооца батлҗ, хоорндан дамшлтарн хувалцна. Цергә шишлң керг-үүлдврт орлцачнриг болн теднә өрк-бүлмүдиг дөңнлһнә, дорас өсч йовх бичкдүдт төрскнч сурһмҗ өглһнә төрт онц оньг өггдв гиҗ Мучан Батыр темдглв. Олна палатын гешүд һурвн җилә цаг-болзгт суңһгдна, тегәд шин гешүдиг батлх кергтә болв. Хальмг Таңһчин Толһач долан гешүдиг батлна, таңһчин Улсин Хурал бас долан күүнд зөв өгнә. Депутатнр дууһан өгәд, зака үүдәгч хургас Дорҗин Бадмиг, Наталья Зинченког, Иван Ивановиг, Елена Крыловаг, Манҗин Элеонораг, Селән Цаһаниг болн Юрий Семеновиг суңһҗ авв.
Хальмг Таңһчин тосхлтын, көлгн-күчнә болн хаалһин эдл-ахун министрин үүл дааҗадг Шахана Андрей «Хальмг Таңһчин көлгнә комплексин болн хаалһин эдл- ахун делгрлт» гидг төрәр тодрха илдкл кеҗ, күцәгдсн көдлмшин аш диглв. Таңһчин хаалһс, тагтс яслһна, әәмшг уга бәәдл тетклһнә, балһснд болн селәд хоорнд олна көлгәр әмтиг зөөлһнә туст шаңһа көтлврмүдин болн келн-улсин төсвсин йовудт ямаран керг-үүлдврмүд күцәгдснә туск тооцаһан өгәд, депутатнриг соньмсулҗадг сурврмудт хәрү өгв. Шахана Андрей шин үүлд ахр цагтан көдлҗәнә, тегәд депутатнр дәкәд энүнлә харһҗ, тосхлтын төрәр күүндх болҗ үгцв. Депутатнр энүнд күцәмҗтә үүлдвр дурдв.
Сессин чилгчәр Хальмг Таңһчин Улсин Хуралын Ахлач Артем Михайлов эн җилин туршарт кесн көдлмшин аш диглҗ, бас тооцаһан өгв. Тиигәд,эн җилд депутатнр 10 сүүр давулҗ, Хальмг Таңһчин Толһачин, таңһчин залврин седвәрәр орулгдсн 47 закана төсвиг батлв. Эн җил цергә шишлң керг-үүлдврт орлцачнриг болн олн үртә өрк-бүлмүдиг дөңнлһнә туск закад хәләгдәд, онц зөвин керг-үүлдврмүд батлгдв. Таңһчин ачлврмудын туск заканд сольвр орулгдад, Советин Союзин Баатр Делгә Эрднин медаль, Хальмг Таңһчин күч-көлснә Баатр болн Хальмг Таңһчин Баатр гидг өөдән ачлврмуд түрүн болҗ бәрүлҗ өггдв. Тер мет Хальмг Таңһчин бәәрн залврин бүрдәцин болн суңһврин комиссин ачта көдләчнрин нерн зүүлһгддг болв. Эн җил түрүн болҗ олн үртә өрк-бүлин Өдр темдглгдв. Хальмг Таңһчин Улсин Хуралын (Парламентин) депутатнр ЮРПА-н сүүрт орлцҗ, Өмн үзгин регионмудла нөкцҗ үүлдв гиҗ Артем Васильевич темдглв.
ДООҖАН Наталья