Сергмҗ үүдәв

Хальмг Таңһчд сурһульд орад уга бичкдүд гер-интернатд бәәдг медәтнрт концерт үзүлв.

«Алтн түлкүр» нертә бичкдүдин садын «Тууль» гидг ах багин күүкд-көвүд медәтнр болн эрмдгтә улс бәәдг Целинн района гер-интернатд одад, билг-эрдмәрн тедниг байрлулв.
Тенд медәтнр сән хәләврт бәәхнь медгднә. Орҗ ирм цацу энд цуг тоотнь цевр-цер дигтә-дарата бәәхнь үзгдв. Хора болһнд зургуд өлгәтә, цецгүд урһагдсн бәәхнь бас чигн эвтә бәәдл тогтана.
Бичкн күүкд-көвүд эн харһлтд белдәд, ду-бииһән дасад, шүлгүд умшад, йөрәлин зургуд зурҗ белдв. Социальн харслтын әңгин көдләчнр бичкдүдиг автобусар нааран авч ирсмн.
Бичкдүд ээҗнрт нерәдсн дуудыг хальмг болн орс келәр дуулв. «Осенний вальс», «Поздравление для мамочки» гидг бииһинь хәләсн медәтнр таасч альхан ташв. Өкәр бичкдүд умшсн шүлгүд энд бәәдг наста улст ик сергмҗ үүдәв. Көгшдин байрта чирә, сергмҗтә кевәр альхан ташснь күүкд-көвүдт ик урмдта болв. Дасч авсн тоотан сән кевәр үзүләд, күүкд-көвүд зурҗ белдсн зургудан көгшдт бәрүлҗ өгв.
Концертин хөөн бичкн артистнриг эн гер-интернатд бәәдг оранжерейд дахулҗ одад, ямаран олн цецгүд энд урһагдсиг, тенд аквариумд бәәдг заһсдыг үзүлв. Медәтнр эн хорад ирәд амрдгин тускар бичкдүдт келҗ өгв.
Иим харһлтс бүрдәлһн үйнр хоорндк залһлдаг батлхнь маһд уга.

ҖИРҺЛИН Кермн