Басан Городовиковин орденәр ачлгдв

Әрәсән әәмшг уга бәәдл тогталһна бүрдәцсин көдләчнрин сән Өдр угтад, таңһчин Улсин Хуралд (Парламентд) Хальмгин Толһачин элч Манҗин Араш Тамбов балһснд бәәдг ФСБ-н генерал-майор Виктор Сафоновд Б.Б.Городовиковин орден бәрүлҗ өгв.
Виктор Никитич Башанта селәнд өсч-боссн күн болна. Эн җилд эн 90 җилин ончта өөнән темдглв. Кесг арвад җилдән Виктор Сафонов әәмшг уга бәәдл тогталһна бүрдәцст көдләд, хөрдгч зун җилин 80-ч җилмүдт Тамбовск мүҗин СССР-ин УКГБ һардҗ йовла. Орн-нутгин әәмшг уга бәәдл тогталһнд ик тәвцән орулад, Улан Одна орденәр болн Әрәсән Президентин Ханлтын бичгәр эн темдглгдв.
Өсч-боссн һазрасн хол бәәдг болв чигн, Виктор Никитич нег һазра баһчудла харһад, байн дамшлтарн хувалцдмн. Ачта амрлһндан һарад, эн хара суухш, олна бәәдл-җирһлд даңгин шунмһаһар орлцна. Ончта өөнләнь болн мана таңһчин өөдән чинртә орденәр ачлгдсн Виктор Сафоновиг нег һазра улсин нерн деерәс әрүн седкләсн йөрәҗәнәвидн.