Өөдән нер зүүснләнь йөрәв

Одахн нег һазра мана дәәч Очр-Һәрән Нарн цергә шишлң керг-үүлдврин йовудт залу-зөргәрн ончрад, Әрәсән Президент Владимир Путинә зәрлгәс иштә орн-нутгин Баатрин нер зүүсн болдг. Эн зәңг таңһчин улст ик байр-бахмҗ үүдәв, гиҗ келх кергтә.
Орн-нутгин тиим өөдән нер бас зүүҗәдг Баатр Гиндеев энүг йөрәв.
– Нарн Хальмг Таңһчин улсин төлә бәәтхә цуг Әрәсән улсин төлә йоста баатр болҗана. Элст балһсна төвд бәәдг Баатрмудын аллейд дәкәд нег одн гилвкв. Өвкнрин үлгүрәр, нег үлү Төрскән харсгч Алдр дәәнә ветеранмудла зерглдҗ Очр-Һәрән Нарна зург эн аллейд дүңгәхмн. Күндтә Нарн, өөдән нер зүүснлә әрүн седкләсн йөрәҗәнәв, цааранднь чигн олна кергин төлә тәвцән орулад, төрскн һазриннь нер дуулулҗ йов, – гиҗ Баатр Александрович темдглв.
КАРСАНА Евгения