Бичкдүдт белгүд илгәгдхмн

Хальмг Таңһчин Улсин Хуралын (Парламентин) депутатнр Луганск Улсин Республикин Антрацитовск района бичкдүдиг Шин җилин байрла йөрәһәд, белгүд нерәдхәр шиидв. Тиигәд, «Күслин һацур» гидг керг-үүлдврин йовудт таңһчин Улсин Хуралын Ахлач Артем Михайлов, энүнә дарукс Бадмин Вячеслав болн Нуура Николай, зака үүдәгч хургин әңгүдин һардачнр кенд ямаран белг белглхән шүүҗ авв.
- Шин җилд бичкдүдин сансн санан күцдг цаг мөн. «Күслин һацур» гидг керг-үүлдвр маднд бичкдүдин сана күцәҗ, эднд байр үүдәх арһ өгнә. Нег үлү күнд таалд туссн бичкдүдт илвтә йовдл учрдг цагт килмҗ тусхаҗ болхнь ик байрта болна, - гиҗ Артем Васильевич келв.
Таңһчин Улсин Хуралын депутатнр удл уга Антрацитин бичкдүдт белгүд йовулхмн. Келхд, эдн хойр җил дарандан эн буйнч седклин кергт орлцҗ, Шин җилин байрла бичкдүдиг йөрәҗәнә. «Күслин һацур» гидг керг-үүлдвр Әрәсән Президент Владимир Путинә седвәрәр давулгдна.
Хальмг Таңһчин социальн делгрлтин, күч-көлснә болн көдлмшәр тетклһнә министерств Антрацитовск района әмтнә социальн теткврин комплексн төвд бас Шин җилин белг белдв. Министерствин көдләчнр ке-сәәхн һацур болн терүг кеерүлх наадһас хулдҗ авв. Буйнч седклин кергт Әрәсән алвна цергллтин Хальмг Таңһчар үүлддг заллтын көдләчнр бас орлцад, Антрацитин бичкдүдт шикр-балта болн наадһас цуглулв. Комплексн төвин социальн реабилитацин әңгин теткврт гемтә-шалтгта 45 күүкн-көвүн болн 191 бөдүн күн бәәнә. Шин җилин өмн өргнд эднд Хальмг Таңһчас илгәсн белгүд бәрүлҗ өггдхмн.

БАТАН Сәәхлә