Җилин аш диглв

Элстд, залврин герт Хальмг Таңһчин Суңһврин комиссин байрин хург болв. Һарчах җилин аш энд диглв. Әңгүдин комиссьмүдин гешүд болн ахлачнр, йосна болн олна бүрдәцсин элчнр терүнд орлцв. Хургиг таңһчин Суңһврин комиссин ахлач Чужан Бембә секәд, нүр үгән келв. Хамгин түрүнд Зулын байрин өдрлә хургт орлцачнриг йөрәҗ теднд орҗах мөрн җилд сән-сәәхн бәәдл җирһл эдлҗ бәәтн гиҗ дурдв.
Цааранднь таңһчин комиссин үүлдврин ашиг диглҗ һарчах җил Хальмг Таңһчин Улсин Хуралын депутат Бембин Санл «Негдсн Әрәсә» партяс нег мандатта 11-ч тойгта округар суңһгдв. Тер мет муниципальн суңһвр болв, энд СМО-н болн РМО-н депутатнр суңһгдв. Эн җил Баһчудын суңһврин комиссин шин хань көдлмшән эклв. Таңһчин Толһач Хаска Батун седвәрәр «Хальмг Таңһчин суңһврин халхин күндтә көдләч» гидг нерн тогтагдв, гиҗ таңһчин Суңһврин комиссин ахлач темдглв.
Түүнә келсәр, 2026 җилд Әрәсән Орн-нутгин Хүүвин депутатнриг суңһлһна дааврта керг-үүлдвр болхмн. Хальмг Таңһчд нег мандатта 15-ч тойгта округар депутат суңһгдх гиҗ Бембә Сергеевич темдглв. Тер мет эн җил таңһчин Суңһврин комиссин сегләтр Надежда Федорченко олн җилдән даавртаһар көдлсндән «Әрәсән Федерацин суңһврин халхин күндтә көдләч» гидг ик ачта нер зүүв. Тер ачлвриг энүнд РФ-н ЦИК-ин Ахлач Элла Памфилова Москвад байрин хургт бәрүлҗ өгв. Тер ик ачлврла бидн Надежда Дмитриевнаг йөрәҗәнәвидн, олн җилдән таңһчин барин көдләчнрлә нөкцлтҗ суңһврин йовудыг цуг таңһчар өргнәр медүллһнд ик нилчән күргҗәнә.
Тер мет эн байрин хургин йовудт Хар Һазра района суңһврин комиссин ахлач Атхан Цаһан болн нань чигн көдләчнр Хальмг Таңһчин Толһачин Ханлтын бичгәр ачлгдв. Октябрьск района суңһврин комиссин ахлач Яна Мусагаджиева (зургт), Элст балһсна һардврин толһач Лиҗикә Алдр болн талдан чигн баг көдләчнрт таңһчин Суңһврин комиссин Күндллһнә һашгуд бәрүлҗ өггдв. Цааранднь болхла баг көдләчнр таңһчин Суңһврин комиссин дипломар болн комиссин Ахлачин Ханлтын бичгәр темдглгдв.
Түүнә хөөн федеральн инспектор Александр Беляев үг келҗ, таңһчин Суңһврин комиссь җилин туршарт дигтә-даратаһар көдлв гиҗ заав. Тана үүлдвр таңһчин мергҗлтин көрң тогталһнд дөң болна, баһчудт закана туск бат медрл өглһнд ик нилчән күргнә, тер көдлмшиг цааранднь чигн күцәх кергтә гиҗ темдглв.
Дарунь Хальмг Таңһчин Улсин Хуралын (Парламентин) Ахлач Артем Михайлов үг келҗ бас таңһчин суңһврин комиссин күцәсн дааврта кергиг темдглҗ, 2025 җилд кесг суңһвр бүрдәгдсн болв чигн, терүг комиссин элчнр заканла ирлцәтәһәр давулв гиҗ заав. Тер мет эн җил Суңһврин комиссь эврәннь үүлдврин 30 җилин өөнән темдглв, түүнә йовудт байн дамшлт хоршагдла гиҗ һардач келв.
Хальмг Таңһчин Суңһврин комиссин көдлмш цаг ирвәс улм өргҗәд, сән йовудтаһар күцәгдҗәнә, тер йовдл мадниг байрлулҗана гиҗ таңһчин Толһачин һадврин һардачин негдгч дарук Тарбан Савар темдглв. Тана көдлмш сән ашта болҗ таңһчин делгрлтд тәвцән орулҗана, гиҗ һардачин дарук заав.

ТҮРВӘН Һуна