Би – донор!

Шидр Т.Хахлынован нертә медицинск колледжин улд «Би - донор! Би җирһл белглҗәнәв!» гидг таңһчин керг-үүлдвр болв. Терүнд эврә сән дурар цусан өгдг улс орлцад, гемтә болн зеткртә йовдлла харһад шав авсн улст дөң күргв. Тедн дунд Хальмг Тапңһчин Толһач Хаска Бату түрүн зергләнд орлцҗ, эн кергиг дөңнв.

- Өрүн босад, цогц-махмудан батрулад, ус ууһад, цусан өгхд белдвр кевв. Эн кергт орлцхин төлә бат шиидвр авв, би урднь чигн цусан өгдг биләв. Донормудын то өсхлә, кесг улст дөң күргҗ әм аврҗ чадхвидн. Ода мана таңһчд 1500 күн олн җилин эргцд цусан өгәд, «Әрәсән күндтә донорин» нер зүүнә. Энтн йоста зөрмг улс болҗ талдан әмтнд үлгүр болна. Эндр эн кергт орлцад, донормудын зергләнд орсн улст ик ханлтан өргҗәнәв. Хамдан бидн әрүн чинртә сән керг күцәҗәнәвидн. Цусан өгч, әмтнд дөң болтн, – гиҗ Хаска Бату нег һазра улст дуудвр кев.
Хальмг Таңһчин Толһачла хамдан эн кергт таңһчин эрүл-менд харлһна министр Саран Булат, энүнә дарук Сарңга Гиләш, дотр-дундын кергүдин министр Дмитрий Григорьев, «Цусна төв» бүрдәцин һардач Уташа Санҗ, П.Жемчуевин нертә таңһчин эмнлһнә ах эмч Чумпинә Саглр, таңһчин бичкдүдин эмнлһнә ах эмч Дорҗин Александр болн нань чигн талдан бүрдәцсин һардачнр орлцад, цусан өгв.
«Би – донор! Би җирһл белглҗәнәв!» гидг таңһчин керг-үүлдврт 140 күн орлцад, эврә сән дурар цусан өгв. Теднәснь 85 күн түрүн болҗ цусан өгснь темдгтә. Т.Хахлынован нертә колледжин оютнр болн багшнр, МЧС-ин болн таңһчин эмнлһсин көдләчнр эн керг-үүлдврт шунмһаһар орлцв.
Эндр, бар сарин 25-д 8 часас авн үд күртл «Би – донор! Би җирһл белглҗәнәв!» гидг таңһчин керг-үүлдвр Элст балһсна төв талвңд болхмн.

ДООҖАН Наталья