Селәнә эмнлһнд көдлнә

Целинн района Овата селәнд «Эрүл-менд харлһн» гидг келн-улсин төсвин йовудт 2019 җилд шин фельдшерск пункт тосхгдв. Селәнә бәәрн улс цаглань эмнлһнә цинск дөң авч, эрүл-мендин бәәдлән шинҗлхин төлә терүнд цуг таал тогтагдсн бәәнә. Энд фельдшер Юлия Антонова болн медицинск эгч Елена Антонова нег һазра улст түрүн дөң күргҗ, эднә эрүл-менд харна.
Юлия Алексеевна болн Елена Николаевна эн селәнд өсәд-боссмн, тегәд эдн цугтаһинь сәәнәр меднә. Урднь энд Ольга Загороднева дөчн һар җилдән көдлҗ йовсмн. Баахн Юлия Ольга Викторовнан чадмг һардврт эклҗ көдләд, байн дамшлтта мергҗлтин килмҗтә дөң-тусар цугинь медҗ дасч авсмн. Энүнә келсәр, эн бичкнәсн авн эрүл-менд харлһна көдләчин эрдм шүүҗ авхин тускар сандг билә. Тегәд дунд сурһулян төгсәснә хөөн Т.Хахлынован нертә медицинск колледжд сурв. Тааста эрдмәрн төрскн селәндән көдлҗәхнь күүкд күүнд ик бахмҗта болна. Урднь селәнә эмнлһнә бүрдәц хуучн бәәрнд бәәршлдг билә, келн-улсин төсвәр энд шин фельдшерск пункт тосхад, түрүн дөң күргхин төлә сән таал тогтав. Фельдшерск пунктд цусна шинҗллт кедг болн ЭКГ кергсл бәәнә. Шин эмнлһнд эмчд бийән үзүлдг болн тәрлһ кедг салу хорас бәәнә, тегәд энд көдлхд болн ирхд таалта.
- Ода селәнд 90 бичкн болн 300 шаху бөдүн күн бәәнә. Цуһар батлгдсн литин йовудт олн зүсн гемәс саглуллһна тәрлһ авна, эрүл-мендин бәәдлән шинҗлнә. Хальмг Таңһчин Толһачин седвәрәр бүрдәгддг «Эрүл-менд бәәтн!» гидг керг-үүлдврин йовудт эмчнр манаһур ирҗ, бәәрн улсин эрүл-менд шинҗлҗ, эмнлһнә туст сүв-селвг өгнә, гемтә-шалтгта болн медәтә улст гертнь одад дөңгән күргнә. Эн җил моһа болн така сармудт эн керг-үүлдвр мана селәнд бүрдәгдсн билә. Селәнә әмтн эмчнр ирснд байрлад, гүн шинҗллт кев, соньмсулҗадг сурврмудар цәәлһвр авв. Эн керг-үүлдврин йовудт түрүн болҗ ямр нег гем илдкгдҗ, дарунь эмнлһ эклҗ түргн дөң күрггдснь темдгтә. Мана селәнә фельдшерск пунктд эмч уга, тегәд долан хонг болһн района эмнлһнәс Увшан Альмн ирнә. Селәнәхн эмч ирхиг медәд, эмнлһнә туст сүв-селвгинь авна, – гиҗ Юлия Алексеевна келнә.
Селәнә эмнлһнә көдләчнр малын хошмудт көдлдг малчнрин эрүл-менд харлһнд бас ик оньг өгнә. Хавртнь эдн малчнрин цус авч, эмчд ирәд эрүл-мендин бәәдлән шинҗлхиг некнә. Намрин кемд болхла эдн грипп болн ОРВИ гемәс саглуллһна тәрлһ кеҗ, бөдүн улсин болн бичкдүдин дунд аһу ик көдлмш кенә. Эн җил зунын чилгчәс авн эдн хальдврта гемәс саглуллһна көдлмшиг экләд, цаглань цугтаднь тәрлһ кев. Тер мет садв гемәс хөрлһнә Манту болн диаскен-тест тәрлһиг эдн бас батлгдсн диг-дарала ирлцәтәһәр күцәнә.
Медицинск эгч Елена Антонова «Земск фельдшер» гидг көтлврин йовудт энд 2022 җиләс авн көдлҗәнә. Шаңһа көтлвр селән һазрт көдлхәр ирсн мергҗлтнриг урмдулна гиҗ Елена Николаевна темдглнә. Энүнә хәләврт селәнә бичкдүд бәәнә. Селәнд дунд сурһуль болн бичкдүдин сад үүлднә, тегәд эн күүкд-көвүдин эрүл-менд харҗ, олн зүсн тәрлһ болн шинҗллт кенә, сурһульчнр дунд чик авг-бәрцин тускар күүндвр тогтана.
Селән һазрт көдлдг эрүл-менд харлһна көдләчнр җалвдан немр 30 миңһн арслң авна. Юлия Алексеевна болн Елена Николаевна Антоновихн төрскн селәндән тааста эрдмәрн көдләд, бәәрн әмтнд цаглань дөң күргҗәнә. Шин эмнлһн тосхгдснь, шаңһа дем күргҗәдгнь эднд көдлмшән үнн-чик седклтәһәр күцәхд ик урмд өгнә.

ДООҖАН Наталья
ЗУРГТ: Овата селәнә эмнлһнә көдләчнр Елена болн Юлия
Антоновихн