Цергчнрин төрмүд – һол оньгт

Шидр Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан һардврт болсн селвлцәнд «Төрскән харсачнр» шаңһа саңгин мана таңһчд үүлддг әңгин үүлдврин аш диглгдв. Саң хойр җил хооран үүлдврән экләд, эн цагин эргцд цергә шишлң керг-үүлдврт орлцсн нег һазра улст болн теднә өрк-бүлмүдт цуг халхин дөң күргҗәнә.

Таңһчд үүлддг саңгин әңгин һардач Хаалһин Очрин зәңглсәр, хойр җилин туршарт зурһан миңһн һар эрлһн орҗ ирв, цергчнриг болн теднә өрк-бүлмүдиг соньмсулҗадг төрмүд хаһлгдв. Эн җил саңгин хайгар хойр миңһн һар эрлһн орҗ ирв. Терүнд нурһлҗ социальн төрмүд, юридическ дөң күрглһн болн цергә үүлдврт орлцсна ветерана зөв авхин тускар келгднә. Саңгин социальн зүүцүләчнрин теткврт 1362 цергч болн теднә өрк-бүлмүдин гешүн бәәнә. Цергә керг-үүлдврт орлцсн нег һазра улсин эрүл-менд батруллһна, көдлмшәр тетклһнә төрмүд хамгин түрүнд хаһлгдна. Тер мет эрмдгтә болн мөч тату дәәчнрт онц килмҗ тусхагдна. Тиигәд, эдниг шишлң көлгәр теткнә, гертнь сән таал тогтана, спортар соньмсхд дөң күрггднә. Селвлцәнд «Баатрмуд 08» көтлврт орлцачнр хәләгдсн төрәр ухан-тоолврарн хувалцҗ, зәрм төрмүдәр сүв-селвгүдән орулв.
- Цергә шишлң керг-үүлдврт орлцачнрт болн теднә өрк-бүлмүдин гешүдт дөң күрглһн мана һол төр болҗана. Эднәс орҗ ирсн эрлһ болһниг онц хәләҗ, босхгдҗадг төрмүдинь хаһлхин төлә килмҗән тусхаҗ, күн болһнд оньг тусханавидн. Төрскән харсач болһн оньг уга үлдшго. Бидн цааранднь чигн нөкцҗ үүлдәд, хамдан арһ-чидлән негдүлҗ эднә төрмүдт орлцхвидн, – гиҗ Өлзәтин Марина селвлцәг товчлҗ келв.