Балһсна талвңд һацур гилвкв

Шин җилин байриг ик-бичкн уга күләнә. Бар сар эклхлә әмтн герән, хашаһан, көдлҗәдг орман чигн сәәхрүлхәр шунна. Балһсн, селән болһн бәәдлән сольҗ олн зүсн өңгәр герлтнә. Нег үлү бичкдүд Шин җилин байрт нерәдсн Киитн аавла болн дурта олн дүрмүдлә болдг харһлтыг күләнә. Эн җил Элст балһсна кесг талвңгудт Шин җилин байрт нерәдсн керг-үүлдврмүд давулгдҗана.

Бар сарин 25-д Элст балһсна Диилврин талвңд углҗ тәвгдсн һацур олн зүсн өңгтә сәәхн герләр гилвкв. Асхн тавн часла тенд олн бичкдүд эк-эцкнртәһән, аавнр-ээҗтәһән цуглрв.
Һаза зөвәр киитн болв чигн, шин җилин байриг күләҗәдг көвүд-күүкд дулан хувцан өмсәд керг-үүлдврт орлцхар адһв. Киитн аав, энүнә ач-күүкнь болн шин җилин һоллгч темдг болҗадг мөрн җил байриг давулв. Темдглхәс, Төрскән харсгч Алдр дәәнә ветеран, эн җилд зун насан зүүсн Петр Леонтьев байрт бас орлцв. Петр Леонтьевич бичкдүдиг дахч бииләд, илвтә кемд иткҗәхән медүлв.
Цуһар һацур эргәд, ду дуулад, би бииләд, бичкдүд шүлгүдән чееҗәр умшад, әмтәхн белгән авад, кен-негән йөрәһәд, цаган сергмҗтәһәр давулсн болдг.
БАДМИН Занда