Дала Ламин гегән Хальмгин Шаҗн Ламла харһв

Дрепунг Гоманг хурлын ах багш гевш-лхарамб Джигме Гьяцон үрврәр Хальмгин Шаҗн Лам гевш Тензин Чойдак Энткгин һазрур залрсмн. XIV-ч Дала Ламин гегәнә ут нас зүүлһнд нерәдсн шишлң ик мөргүлд эн орлцв.

Оюни ик чинртә шаҗна эн керг-үүлдвриг Дрепунг Гоманг хурлын гелңгүд күцәҗәнә. Бар сарин 24-д нааран Дрепунг Гоманг хурлур олн гелңгүд болн бурхн-шаҗнд шүтдг олн улс цуглрҗ ирв. Мана таңһчас зун һар күн тииглән одад, эн ик чинртә шаҗна үүлдврт орлцв. Дала Ламин гегәнд күндллһән медүлхәр делкән кесг орн-нутгас әмтн ирсмн. Тедн дунд күндтә гиичнр чигн оларн ирсинь темдглҗ болхмн.
Ончта керг-үүлдврин өмн өдрәр Хальмгин Шаҗн Лам Дала Ламин гегәнлә харһҗ күүндв. Гевш Тензин Чойдак Күңкл Багшт гүн седклин ханлтан медүләд, Бурхн Багшин әрүн тоотла ирлцәтә темдгүдәр белг бәрүлҗ өгв. Дала Ламин гегән гевш Тензин Чойдакд әдс өгәд, бурхн-шаҗна номиг делгрүллһнд күцәмҗ дурдв.
Эн йовлһндан Хальмгин Шаҗн Лам нань чигн күндтә багшнрла болн ик цолта гелңгүдлә харһҗана. Иигәд гевш Тензин Чойдак Кунделинг Тацак ринпочела харһв. Эднә күүндврин ашар ирх җилин хаврар күндтә Кунделинг Ринпоче Хальмгт ирх болв. Хальмгин һол хурлын барин цергллт зәңглсәр, күндтә багш Кунделинг Ринпоче Бурхн Багшин номин цәәлһвр өгхмн. Урднь чигн ик цолта эн ламин цәәлһврт орҗ йовсн Хальмгин әмтн эн зәңгиг байртаһар тосв.
Дрепунг Гоманг хурлын ах багш, гевш лхарамб Джигме Гьяцола Хальмгин Шаҗн Лам харһв. Гевш Тензин Чойдак оюни чинртә керг-үүлдврт орлцтха гиҗ үрвр кеснднь Джигме Гьяцод үнн седклин ханлтан медүлв. Күүндврин йовудт Хальмгин хурл болн Дрепунг Гоманг хурлын хамцу цаарандк үүлдврин тускар келгдв. «XIV-ч Дала Ламин гегәнә бүтәсн кергүд» гидг шин дегтриг төвд келнәс орс келнд орчуллһнд дөң болтха гисн тоолвран Дрепунг Гоманг хурлын ах багш медүлв.
Йириндән эн хурлла Хальмгин хурл өөрхн залһлда бәрҗ үүлднә. Җил болһн Дрепунг Гоманг хурлын гелңгүд Хальмгт ирҗ мандл тосхна, номин цәәлһвр өгнә. Иим евәлтә йовдлыг шаҗнд шүтдг Хальмгин бәәрн әмтн тодлна, эн хурлын багшнр дәкнәс ирхиг даң күләцхәнә.

УШКАНА Сувсн