Күүнә әм аврна

Эндр Әрәсән МЧС-ин көдләчнр, нег үлү әм аврачнр сән Өдрән темдглҗәнә. 1990 җилд бар сарин 27-д мана орн-нутгт әм аврачнрин әңг бүрдәгдәд, дигтә 35 җил болв.
Әм аврачнр чидлтә, зөргтә, чаңһ-чиирг улс болдг мөн. Эдн зеткртә йовдлмуд, түүмр, йиртмҗин болн талдан әәмшгтә олн зүсн аюл учрсн саамд түрүн зергләнд дөң-тусан күргдгнь лавта юмн.
Әм аврачнрин көдлмш амр биш зөвәр әәмшгтә болдгнь ил медгднә. Өдр-сө уга гилтә эдн чидлән болн әмән әрвллго церглнә.
Өцклдүр Хальмг Таңһчин МЧС-ин Заллтд болсн байрин хургт 2025 җилин ашинь диглв. Керг-үүлдврт йосна болн зөв-йос харлһна бүрдәцсин элчнр орлцв. Тер мет терүнә йовудт көдлмшән даавртаһар, үнн-чик седклтәһәр күцәсн көдләчнр Күндллһнә темдгүдәр ачлгдв.
Эн җил МЧС-ин көдләчнр хаалһст учрсн 2813 зеткртә йовдлд орлцҗ, 15 күүнә әм аврв. Хөн сарин 19-д Үстин районд болсн әәмшгтә зеткртә йовдлд долан күн әмнәсн хаһцв, 11 күн болхла күндәр шавтв. Тиигхд әм аврачнр түрүн дөңгән күргсн болдг. Темдглхд, җилин йовудт усн дотр зеткртә йовдлмуд учрсн уга. Дамшлһна нәәмн керг-үүлдвр сән йовудтаһар давулгдв.
Таңһчин райодт болхла эврә дурар үүлддг түүмр унтрадг багмуд көдлнә. Эн җил Яшалтан районд дәкәд нег баг бүрдәгдв, җилин туршт эдн 89 түүмр унтрав. Эврә дурар үүлддг түүмр унтрадг 184 әңгд эндр ут тоодан 1187 күн көдлнә, теднә медлд 51 шишлң көлгн бәәнә.
Терүнәс нань җилин йовудт МЧС-ин көдләчнр сурһуль-эрдмин бүрдәцсин арвтнрла харһҗ, көдлмшиннь тускар тодрхаһар келҗ өгнә. Тер мет олн патьрта болн эврә гермүдт бәәдг иргнмүдлә түүмрәс саглулхин төлә харһлтс давулгдад, ирлцңгү сүв-селвг өггдв. 644 герт түүмрәс саглулдг докъя өгдг 1083 кергсл углҗ тәвгдв.
Сүл җилмүдт әм аврачнрин көдлмш баһчуд дунд тааслт олад, кесгнь эн эрдмәр шишлң сурһульд сурхар шиидв. Тодлхд, кесг җил хооран Б.Б.Городовиковин нертә Хальмг ик сурһульд әәмшг уга бәәдл тогталһна халхар мергҗл секгдв, тенд ода олн көвүд-күүкд сурчана.
Ашлад келхлә, урдк җиллә дүңцүлхлә, хаалһд учрсн зеткртә йовдлмудын то хойр процентд өсв, түүмр болхла баһрвсн болв. 2025 җилин йовудт МЧС-ин көдләчнр түүмрәс 100 күүнә әм аврв.
Күндтә әм аврачнр, сән Өдрләтн болн өөрдҗәдг Шин җилин байрла әрүн цаһан седкләсн йөрәҗәнәвидн! Олнд кергтә тана көдлмш өмәрән йовҗ, эрүл-менд, гем-шалтг угаһар, байрта-бахта йовхитн дурдҗанавидн.

КАРСАНА Евгения