Шаңһа Хүүвин сүүрт орлцв

Урҗ өдр Хальмг Таңһчин Толһач Хаска Бату Москвад Әрәсән Президент Владимир Путинә һардврт болсн Шаңһа Хүүвин сүүрт орлцв. Терүнд күч-көлснә рынкин болн экономикин халхд кадрмуд белдлһнә төрмүд босхгдв.
– Эндр шин эв-арһс өргнәр делгрҗәхиг учртан авч, кадрмуд белдлһнә кев-янзиг оңдарулх кергтә. Хальмг Таңһчд цуг орн-нутгт мет күч-көлсчин эрдмтә мергҗлтнр керглгдҗәнә. Энүнәс иштә баһчуд шишлң сурһульд орхин төлә урмдулгч эв-арһс күцәҗ җалвинь икдүлх кергтә. Эн туст мана таңһчд көдлмшәр теткдг болн сурһулин бүрдәцсин үүлдвриг зүүцүлдг дааврта күн кергтә болҗана. Таңһчин залврт эн туст ирлцңгү даалһвр өгчәнәв. Тер мет эн җилд таңһчд «Кадры» нертә келн-улсин төсв экләд күцәгдв. Энүнә йовудт 300 күн шин эрдм дасч авв. Таңһчин делгрлтин шишлң көтлвр экләд күцәгдҗәнә, энүнә йовудт көдлмшч 1500 шин орм бүрдәҗ болхмн. Хальмг Таңһч чидл өгчәдг һазр болдгинь дәкнәс тодлулҗанав. Тегәд төрскн һазртан бәәһәд, энд көдләд, өркән өндәлһәд, үрдән өсктн, – гиҗ Хаска Бату баһчудт үрвр кеҗәнә.
Чинртә сүүрин чилгчәр Бату Сергеевич Кремлин бәәшңд «Күслин һацур» нертә керг-үүлдврт орлцв. Җил болһн эн керг-үүлдвр җирһлин күнд таалд туссн бичкдүдин төлә бүрдәгднә.
Хаска Бату һурвн бичкнә күслинь күцәх болв. – Бичкдүд – мана иргч, эднә төлә бидн цуг таал тогтаҗ, шин җилин өмн өргнд белгүдинь бәрүләд, илвтә кем учрҗахинь иткүлнәвидн, гиҗ Бату Сергеевич темдглв.

ОЛЬДАН Цаһан