Бүртклһиг чаңһахар

Давсн җилин сүл өдрмүдт Хальмг Таңһчин Улсин Хуралын (Парламентин) дарани биш сессь болв. Сүүрт федеральн инспектор Сергей Бойко, Әрәсән Федерацин Хүүвин гешүд Байир Путеев болн Борис Хачиров, Хальмг Таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йосна, зарһин, бүртклһнә бүрдәцсин элчнр орлцв.
Сессьт зуг нег төр хәләгдв. Сән кец-таал тогталһна көдлмш күцәлһнә йовудт таңһчин муниципальн бәәрн залврин болн шаңһа йосна бүрдәцс хоорнд даавриг дигллһнә туск закана төсвәр күүндвр болв.
Хәләгдсн төрәр Хальмг Таңһчин ЖКХ-н болн энергетикин министрин үүл дааҗадг Константин Климентьев зәңгллһ кев. Дааврта һардачин келсәр, сән кец-таал тогталһна зураг дигтә-даратаһар күцәлһнә бүртклһнә керг-үүлдврмүдиг чаңһахин төлә эн төсв белдгдв. Эн төр урднь комитетин сүүрт хәләгдсн билә, тегәд депутатнр закана төсвиг батлх шиидвр авв.
Сессин чилгчәр Артем Михайлов намрар болсн шар шаҗна нарт-делкән ик хург бүрдәлһнд тәвцән орулсн депутатнриг болн Улсин Хуралын көдләчнриг Хальмг Таңһчин Толһачин Ханлтын бичгәр ачлв. Әрәсән Федерацин Хүүвин гешүд Байир Путеев болн Борис Хачиров Хальмг Таңһчин залврин Ахлач Босхмҗин Гиләнд Әрәсән Федерацин Хүүвин Күндллһнә һашг, Хальмг Таңһчин Улсин Хуралын (Парламентин) Ахлачин дарукс Нуура Николайд болн Бадмин Вячеславд, таңһчин залврин Ахлачин негдгч дарук-таңһчин хазна министр Шурһчин Очрт Әрәсән Федерацин Хүүвин Ахлачин Ханлтын бичгүд бәрүлҗ өгв.

ДООҖАН Наталья