Мана умшачнрт итклтә бәәнәвидн

Күндтә мана умшачнр! Һарcн Моһа җил мадна төлә амр биш болв. Тер бийнь цаг негәр бәәдмн биш. Негт ора, негт җора гидг. Бидн хамдан эн җаңһрта цагиг давҗ һарад, таднд маднд итклтә болҗахан медүләд, эн нарт-делкә деер хальмг келәр һардг ор һаңцхн мана газетиг дөңнҗ, газетиг бичүлҗ авад, маднд урмд өгнәт. Орсн Мөрн җилин түрүн өрәлд «Хальмг үнн» газетд бичгдлһнә кемд шунмһа кевәр орлцсн Лаганя, Целинн, Хар Һазра, Яшалтан, Октябрьск, Сарпан райодын ахлачнрт, эврә умшачнрт әрүн седкләсн ик гидг ханлт өргҗәнәвидн! Тадн мана газетд дөңгән күргсн деерән, хальмг кел делгрүллһнд, үндсни сойл батруллһнд баһ-биш тәвцән орулҗ бәәнәт! Цугтан эрүл-менд, сән-сәәхн бәәтн!
Нә, мана күндтә умшачнр!
Шин җиллә тадниг йөрәҗәнәвидн!
Бәәсн һазрин байн сәкүсн хәәрлҗ,
Цуг тадн ханядн-тома уга бәәҗ,
Хан Теңгр хәәрлҗ,
Хамг әмтн амулң эдлҗ,
Бурхн Теңгр өршәҗ,
Буйн-кишг ирҗ,
Бурхн-шаҗнь делгрҗ,
Байрта-бахта цугтан бәәхиг
Деедсин олн бурхдын
Делкән Цаһан эзн евәх болтха!

БЕМБИН Евгений