Хальмг теегин һәрд Энткгин һазрт күрч

Шин җилин амрлһна өдрмүдлә соньн зәңг ирв. Хальмгин һазрас нисч ирсн теегин һәрдиг Энткгт олҗ авсна тускар тер зәңгд келгдв. «Хар һазр» заповедникин номин әңгд тиим зәңг ирсмн.
«Шовудт тамһ тәвлһнә диг-дарана туск соңсхврла таньлдҗаһад, нег зәңгд оньган өгвидн. Хальмгин тамһта һәрд шовуг Энткгт үзснә тускар терүнд келгдсн билә. Прайджот Ханчанале тер шовуна зургиг цокч авсмн. Энткгин Гуджарат штатд мал оршадг бәәрнд тер зург кегдҗ», – гиҗ заповедникин көдләчнр келнә.
Теегин һәрдиг H-646 гидг тойгар темдгләд, төөлг зүүлһсн бәәҗ. Заповедникин номин көдләч Абушинә Антон болн Ростов-на-Дону балһснас дамшлт авхар ирсн оютн Дарья Десятова тер тамһллһна көдлмшиг 2023 җилин мөчн сарин 15-д күцәсн бәәҗ. Теегин һәрдин бүүрлсн бәәрн Яшкулин района Хулхт селәнә болн «Ацан Худг» гидг ормин хоорнд бәәсмн.
Цааранднь йир соньн юмн болв. Зурһан сара хонг болад, 2023 җилин бар сарин 13-д теегин һәрд H-646 Энткгин һазрт күрснь темдглгдҗ. Теегин һәрд ямаран күчтә гинәт! Хальмгин һазрас Энткгин һазр күртл һооднь тоолхла 3453 дууна һазр болҗана. 2023 җилд һурвн бичкн һәрдиг хотлҗ өсксн эр эм хойр һәрдин һууҗмул бәәснәс тиигҗ өссн һәрд H-646 тиим холд күрәд, чидл-чииргән медүлсн деерән хойр һазрин номтнрин залһлданд туслҗ йовхинь темдглий. Эн һәрдин эк-эцк болҗадг һәрднр һурвн һууҗмул һарһҗ өскч чадснь йириндән номтнрин тоолврар ик чинртә йовдл болҗана.
«Теегин һәрд тиим хаалһ кеснь номин халхар онц чинр зүүҗәнә. Хальмг теегин һәрднрин нислһнә хаалһсинь йилһҗ авхд тернь туслхнь маһд уга. Деед үзгин һәрд шовуд ик зуудан үвлин кемд Аравийск тоха арлд эс гиҗ Деед Африкин һазрт күрдг бәәсинь номтнр меднә. Дорд үзгин һәрд шовуд болхла, келхәс төв Казахстана болн Алтан-Саяна һазрин шовуд Индо-Пакистана һазрт үвлздгнь темдгтә. Хальмгин һәрд H-646 шовун, тиим холд Гуджарат штатд нисч күрснь нег үлү өврмҗтә болҗана. Шовуд үвлзлһнд нислһнә хаалһс сольгдад бәәдгинь, зәрмдән нег негнә хаалһан керч нисдгинь эн йовдл медүлҗәнә. Һәрд шовуд нисч арһан хәәлһнә хаалһс ямаран соньн болдгиг хальмг һәрд холд нисәд иткүлв», – гисн тоолврарн заповедникин көдләчнр хувалцв.

УШКАНА Сувсн