Хальмг эмчнрин буйнч седкл

П.Жемчуевин нертә эмнлһн мана таңһчд эрүл-менд харлһна халхд һоллгч бүрдәц болна. Энд таңһчин әмтн эмнлһ авна, гүн шинҗллт кенә, эрүл-мендән батрулна. Энд 2025-ч җилин эргцд кеҗ-күцәсн көдлмшиг ашлад, күцәмҗин болн иргч зуран тускар бас келв.

Таңһчин эмнлһнә ах эмч Чумпинә Саглрин келсәр, эн җил мана орн-нутгт Төрскән харсачин җил болсн билә, тегәд бүрдәцин көдләчнр цергә шишлң керг-үүлдврт орлцҗадг нег һазра улсиг дөңнлһнә кергт ик оньг тусхагдв. Эмнлһнә көдләчнр Запорожск мүҗин Токмак балһснд одад, тенд цергә даалһвран күцәҗәдг дәәчнрт эм, дулан хувц, шав авсн цагт кергтә кегдлмүд, дизельн генератормуд, квадрокоптермуд күргҗ өгв. Тенд таңһчин эмнлһнд эрүл-мендән батрулсн цергчнр дәәлдҗ йовна, тегәд бүрдәцин көдләчнр теднә менд медхәр одв. Цергә керг-үүлдврт орлцачнрт дөң күргсн төләдән 9 эмч болн 4 медицинск эгч «Фронтд дөң күргсн төлә» гидг медаляр ачлгдв. Эмнлһнә бүрдәцин эмч «Баатрмуд 08» сурһулин көтлврин Олна хүүвин ханьд орв.
Хальмг эмчнр Луганск Улсин Республикин Антрацитовск района эрүл-менд харлһна көдләчнрт бас дөңгән күргҗ, дамшлтарн хувалцҗ бат залһлда бәрнә, бәәрн әмтнә эрүл-менд шинҗлҗ эмнлһнә туст сүв-селвг өгнә. Нидн таңһчин эмнлһнә эмчнр орн-нутгин меҗә һатц дөңгән күргснь темдгтә. Хаврар Мьянма орн-нутгт һазр чичрәд, кесг күн шав авад, әмнәсн хаһцсн билә. Хальмг Таңһчин Толһач Хаска Батун даалһврар таңһчин эмчнр тиигәрән һарч йовад, бәәрн әмтнд түрүн дөң күргсмн. П.Жемчуевин нертә таңһчин эмнлһнә эмчнр Болдра Олег, Цевгә Николай болн Цевгә Хоңһр эмчнрин багд орад, 140 һар күүнд дөң болад, эмнлһ болн месллһ кев.
- 2025-ч җилд мана эмнлһнә улд эндокринологическ төв болн зүркнә гемтә улст дөң күргдг хора секгдснь ончта йовдл болв. Энд әмтнд дөң күргсн деерән эн әәмшгтә гемәс хөрлһнә болн саглуллһна көдлмш күцәгднә. Мана эмнлһнд өөдән чинртә месллһс кенә, шин эв-арһс өргнәр олзлгдна. Таңһчин хол селәдт дөң күрглһнд мана мергҗлтнр бас ик оньг өгнә. Тиигәд, таңһчин Толһачин седвәрәр бүрдәгдсн «Эрүл-менд бәәтн!» гидг керг-үүлдврин йовудт мана эмчнр цуг райодт одв. Шинҗллтсин йовудт ямр нег гем илдкгсн улс мана бүрдәцд цаглань эмнлһ авв, - гиҗ Саглр Юрьевна келв.
Намрар мана таңһчд болсн шар шаҗна нарт-делкән ик хургин йовудт таңһчин эмнлһнә һаза Отч манлан Бодь суврһн босхгдв. Терүг секлһнд Мьянма болн Шри-Ланка орн-нутгудас ирсн күндтә гиичнр орлцад, ном умшв. Эн җил мана таңһчур көдлмшин халхар Әрәсән Федерацин Хүүвин Ахлачин дарук Инна Святенко ирәд, таңһчин эмнлһнд эрүл-мендән батрулҗадг цергә шишлң керг-үүлдврт орлцачнрла харһв.
Таңһчин эмнлһнә ах эмчин темдглсәр, көдләчнрин мергҗлт өөдлүллһнд, баһчуд энд ирҗ көдлхиг урмдуллһнд онц оньг өггднә. Эн җил эмнлһнд олн җилдән үнн-чик седклтәһәр көдлҗәдг эмчнр Бакан Галина болн Дальдинә Сергей «Әрәсән ачта эмч» болн ах медицинск эгч Могушкован Лейла «Әрәсән эрүл-менд харлһна ачта көдләч» гидг өөдән нер зүүв. Эн җил 37 эмч болн 121 дунд медицинск көдләч энд көдлдг болв, дамшлтта мергҗлтнр эднд дөңгән күргнә. 2028 җилд таңһчин эмнлһнд гемтә улсиг орулҗ авдг әңгин шин бәәрн тосхгдхмн гиҗ зуралгдҗана. Тенд өдгә цага медицинск кергсл углҗ тәвгдхмн, көдләчнрин болн әмтнә төлә сән таал тогтагдхмн.

ДООҖАН Наталья