Олн үртә эк тааста кергән делгрүлҗәнә

Сегодня, 11:53 | Общество, Таңһчин зәңгс

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, нидн мана таңһчд 655 өрк-бүл социальн бооца батлв. Ут тоодан орн-нутгин хазнас эднд 147,4 сай асрлң болн таңһчин хазнас 1,5 сай арслң йилһгдв. Шаңһа дөңгәр 302 күн эврә керг бүрдәҗ, онц арһлач болҗ үүлдҗәнә. Селән һазрт бәәдг 114 өрк-бүл социальн бооцана йовудт мал хулдҗ авад, бийән теҗәдг болв. Лаганя районд бәәдг олн үртә Бембин Кермн давсн җилд бас социальн бооца батлад, шаңһас өггдсн мөңгәр эврә керг бүрдәҗ чадв. Района әмтнә социальн харслтын цергллт күүкд күүнә севдәриг дөңнәд, олзта-орутаһар үүлдхд дөң күргв.
- Мини таньл күүкд района әмтнә социальн харслтын цергллтлә бооца батлад, эврә керг бүрдәсн билә. Теднлә күүндәд, ямаран бәрмт цаас кергтәһинь, үүлдврин зура ямр кевәр белдхин тускар күүндәд, теднә сүв-селвг авсна хөөн би бас эн көтлврт орлцхар шиидв. Би 2020 җилд хумс эд-бод кеҗ сәәхрүллһнә эрдм дасч авлав, тегәд эн халхд әмтнд туслҗ күргҗ көдлнәв. Давсн җилин туула сард би социальн бооца батлад, шаңһас йилһгдсн 350 миңһн арслңгар кергтә кергсл хулдҗ авв. Шишлң ширә, суудл, хумс эд-бод кедг кергсл, шам болн нань чигн кегдлмүд хулдҗ авад, әмтнд сән чинртә туслмҗ күргҗ үүлдҗәнәв. Җирһлин күнд таалд туссн, баһ тетквртә, көдлмш уга улст шаңһас дөңцл мөңг йилһҗ өгдгнь йир сән. Эврәннь кергән делгрүлхд им сән арһ өгчәхнь өрк-бүлән теҗәҗ, тааста эрдмәрн олзтаһар көдлхд шаңһа дөң ик урмд өгнә. Таньл-үзл улст би социальн бооцана көтлврин тускар келҗ, эврә керг бүрдәҗ үүлдтн гиҗ селвг өгнәв. Би арһлач болҗ көдләд, эврәннь диг-дараһар үүлдҗ, цаган диглҗ чаднав, - гиҗ Кермн бер келнә.
Бембин Кермн цагин некврлә ирлцҗ әмтнд сән чинртә туслмҗ күргхин төлә мергҗлтән өөдлүлҗ, эрдмин халхар шин медрл хоршахар шунна. Тиигәд эн Әәдрхн, Элст балһсдт йовад, хумс эд-бод келһнә туст шин эв-арһс дасч, нертә мергҗлтнрин семинармудт орлцна. Эн җилмүдин эргцд энүн тал ирдг улсин то өсәд йовхнь эн сән мергҗлт болҗадгиг медүлҗәнә. Көлин тавг болн хумс эд-бод келһнә туст туслмҗ күргдг мергҗлтнр уга гиҗ бәәрн улс ухан-тоолврарн хувалцҗ келдг бәәсмн. 2024 җилд Кермн Анатольевна Әәдрхн балһснд подологин эрдм дасад, районд түрүн мергҗлт болв. Күүкд күүнә келсәр, медәтә, гемтә-шалтгта улс көлиннь хумс эд-бод кеҗ чадлго зовна, тегәд эднә эс гиҗ элгн-саднаннь сурврар гертнь чигн одад, эн туслмҗан күргнә.
- Эн җил би района селәдт бәәдг улс тал күрхәр зуралҗанав. Харм төрхд, гемин уршгар гертәсн һарч чаддго улсин, медәтнрин элгн-саднь эднд подологин дөң кергтә гиҗ сурна. Дәкәд зәрм улс иим туслмҗ авхас эмәнә, тегәд би үүлдвриннь тускар олнд медүләд, медәтнрин төлә шишлң харһлтс давулхар зуралҗанав. Шаңһа дөңгәр хулдҗ авсн кергсл өөдән чинртә туслмҗ күргҗ әмтнд дөң болх арһ өгв. Ода мини керг му бишәр делгрҗәнә, би тааста эрдмәрн олзта-тустаһар көдлҗәнәв. Медәтә болн эрмдгтә улст дөң күргх санан бәәнә, тегәд эн җил үүлдврән эн халхар делгрүлх санан бәәнә, - гиҗ Кермн Анатольевна келнә.
Эврә керг бүрдәсн Бембин Кермн олн үртә эк болад, өрк-бүлдән килмҗән тусхаҗ, герин чимг болна. Герин эзн Долан греко-римск бөк бәрлдәнә дамшачар көдлнә. Дөрвн көвүнь бичкнәсн авн спортар соньмсҗ, чик авг-бәрцәр бәәҗ, чаңһ-чиирг болҗ өсчәнә. Ууһн Данила ода оютн, эн Химки балһснд олимпийск көрңгин сурһульд сурчана. Артем сурһульч, олна бәәдл-җирһлд шунмһаһар орлцҗ, спортын халхар ик күцәмҗ бәрҗ байрлулна. Дава болн Энкин бичкдүдин садт орна, эдн эцкәсн болн ахнрасн үлгүр авч бас бөкнр болхнь лавта. Кермн сул цаг учрхла, үүл бәрҗ ке-сәәхн хувц өлгхдән эс гиҗ уйхдан дурта. Өнр-өсклң өрк-бүл хамдан зуульчлҗ амрхдан таасна.
ДООҖАН Наталья
ЗУРГУДТ: Бембин Кермн көдлмштән; мергҗлтән өөдлүлснә иткл цаас авн кем

Видео