Немр сурһуль сурад

«Кадрмуд» гидг келн-улсин төсвин йовудт күцәгдҗәдг шаңһа көтлвр шин эрдм дасхд туслҗахин тускар Хальмг Таңһчин социальн делгрлтин, күч-көлснә болн көдлмшәр тетклһнә министерств зәңглв. Тиигәд, Элст балһснд бәәдг Бадм-Хаалһин Галина эн көтлврт орлцад, «Промт-инжиниринг» гидг немр эрдм дасв.
Шаңһа көтлврин йовудт немр сурһуль сурад, Галина Александровна шин эрдмәрн нефтин болн газин колледжд багшлдг болв. «Цагин некврлә ирлцҗ өдгә эрдм дасч авснь шин арһ өгв. Таңһчин әмтиг көдлмшәр тетклһнә цергллтин көдләчнр немр сурһуль өңгәр сурч шин эрдмтә болхд нанд ик дөң-тусан күргснд ик ханлтта бәәнәв. Ода би шин эрдмәрн багшлҗ, соньн керг күцәҗ, оютнрт өдгә цага эв-арһсин туск медрл зааҗанав», - гиҗ Бадм-Хаалһин Галина темдглв.
Шин эрдм дасхин төлә «Әрәсән көдлмш» гидг негдсн то-дигин талвңд эрлһән орулҗ өгч болҗана. Дарунь әмтиг көдлмшәр тетклһнә цергллтд ирәд, кергтә бәрмт цаас авч ирх кергтә. Әрәсән Президентин медлд улсин эдл-ахун болн шаңһа цергллтин академь, Томск шаңһа болн профессиональн сурһуль делгрүллһнә ик сурһульмуд, Әрәсән көч-көлснә министерствин күч-көлснә ВНИИ сурһулин көтлврин йовудт немр эрдм дасхна.
БАТАН Сәәхлә