Төрскнә Баатрмудт нерәдәд

Урҗ өдр таңһчин Росгвардин Заллтд тогтсн авъясар һарсн җилин ашдиглҗ болн иргч көдлмшт нерәдсн өргн сүүр болв. Хальмг Таңһчин Толһач Хаска Бату, Улсин Хуралын (Парламентин) Ахлач Артем Михайлов, зөв-йос харлһна бүрдәцсин һардачнр, ведомствин офицермүд болн көдләчнр терүнд орлцв.
Хальмгин Росгвардин Заллтын һардачин дарук, полковник Анатолий Зеленских 2025 җилин ашинь диглҗ, кеҗәдг көдлмшиг, терроризмлә ноолда келһнә болн иргнмүдин төлә әәмшг уга бәәдл тогталһна туст көдләчнрин тәвцинь темдглҗ өөдәнәр үнлв.
Җил болһн зөв-йос харлһна бүрдәц болһна үүлдвр амр биш болна, тер бийнь тәвсн күслән цуһар күцәв. Росгвардин көдләчнр эврә таңһчдан бәәтхә цергә шишлң керг-үүлдвр давҗадг һазрт чигн түрүн өдрәснь авн бас эвин бәәдл тогталһна кергт тәвцән орулҗ йовна.
– Өдр болһн Росгвардин көдләчнр үнн-чик седклтәһәр даалһврмудан цаг-болзгтнь күцәнә. Төрскән харсачин җилин йовудт тана хамцу багин кесн көдлмш ил үзҗ болв. Цааранднь чигн таңһчин һардврла болн йосна бүрдәцсин элчнрлә нөкцлтҗ йовтн. Заллтын һардач, полковник Настинә Нарнд онц ханлтан өргҗәнәв, – гиҗ Хаска Бату темдглв.
Сүүрин йовудт Росгвардин ончрсн офицермүд болн цергчнр шаңһа ачлврмудар болн Хальмгин Толһачин Ханлтын бичгүдәр темдглгдв.
Тер мет керг-үүлдврт орлцсн таңһчин Улсин Хуралын (Парламентин) Ахлач Артем Михайлов росгвардейцнрин көдлмшинь өөдәнәр үнлҗ, Нарн Мазановичд Ханлтын бичг бәрүлҗ өгәд, көдлмштнь күцәмҗ дурдв. Терүнәс нань кесг офицермүдт Росгвардин медальмүд болн дарани цол зүүлһгдв.
Сүүрин чилгчәр Росгвардин Заллтын һардач, полицин полковник Настинә Нарн ведомствин көдлмшт даңгин оньган тусхадг таңһчин һардврт ханлтан өргәд, эн җил зуралсан эрк биш күцәхвидн, гиҗ иткүлв.
Тер өдр Росгвардин Заллтын герин шидр Төрскнә Баатрмудт нер эдсн бумблв секлһнә керг-үүлдвр болв. Цергә халхар кергән күцәҗ йовад, әмнәсн хаһцсн улсин санлынь тиигҗ мөңкрүлв. Бумблвин тал дунднь хаш чолунас кесн Росгвардин хувцта, һартан буута өндртән хойр метр шаху цергч зогсчана. Энүнә хойр талднь шишлң самбрмудт әмнәсн хаһцсн баатрмудын зургуд үзҗ болхмн болн теднә туурмҗин тускар тодрхаһар бичгдв. Әрәсән Баатр Магомед-Казим Гайирхановин, Залу-зөргин орденәр ачлгдсн Эрднин Александрин, Владимир Абдулинә, Манкан Сергейин, Александр Качановин болн талдан цергчнрин нерд мөңкрүлв.
Таңһчин Толһач Хаска Батун темдглсәр, орн-нутгин, таңһчин, мана келн-улсин тууҗин, Төрскн һазриннь баатрмудын тускар дорас өсч йовдг үйнрт эрк биш медүлх кергтә. Эндр секгдсн бумблв тал цуһар ирәд, санлынь тевчҗ чадҗана гив.
– Арвн җил хооран 2016 җилд Әрәсән Президент Владимир Путинә зәрлгәс иштә мана орн-нутгт Росгвардь бүрдәгдв. Тер цагас нааран иим керг күцәхәр ухалҗ йовлав. Ода болхла, таңһчин һардврин, ирлцңгү бүрдәцсин болн хамдан көдлҗәдг үүрмүдин дөңнлтәр эн бумблв босхгдв. Эн керг күцәлһнд тәвцән орулсн улст ик ханлтан өргҗәнәв, – гиҗ Настинә Нарн товчлв.
Керг-үүлдврин чилгчәр цуһар бумблвд гүрмр цецгүд тәвәд, баатрмудын санлынь тевчв.
КАРСАНА Евгения