Таңһчин һардачнр марһанд орлцхмн

«Әрәсә – эв-арһсин орн-нутг» гидг талвң орн-нутгин толһач Владимир Путинә даалһврар 2017 җиләс авн «Әрәсән нүүрләчнр» гидг марһа давулҗана. Эн җилмүдин эргцд терүнд Әрәсән болн 150 орн-нутгас нег сай һар эрлһ орҗ ирсмн, терүнә ашар 650 күн шаңһа үүлд батлгдв. Эн җил болх зурһадгч марһанд Әрәсән 89 регионас болн 66 һазадын орн-нутгас ут тоодан 75395 күн эрлһән орулв, тедн дунд Хальмг Таңһчас 246 күн билә. Эн җил түрүн болҗ багмуд дунд марһан болхмн. Ода күн болһна эрлһиг шинҗләд, багин ханьд орҗ чадхин төлә шишлң некврт ирлцҗәх угаһинь хәләһәд, эднд залврин дамшлт бәәх угаһинь бүрткв.
«Әрәсә – эв-арһсин орн-нутг» гидг талвңгин һардач, «Сенеж» заллтын мастерскийин ректор Андрей Бетинә келсәр, шаңһа болн корпоративн сән гисн багин нер зүүхин төлә орн-нутгин нүүрлгч компаньс орлцхмн, теднә багиг һардачнр болн вице-президентмүд һархмн. Дәкәд орн-нутгин министерствс дунд 59 баг марһлдхмн. Әрәсән 77 субъект эврәннь элчнрин баг бас тогтав, теднә ханьд вице-губернатормуд болн региональн залврин Ахлачнр бәәнә. Удл уга эдн цугтан марһанд орлцад, орн-нутгин сән гисн залврин багин нер харсхин төлә медрлән, эв-арһан үзүлхмн, гиҗ Андрей Бетин темдглв.
«Шаңһа залврин баг» гидг әңгд ут тоодан 162 баг эрлһән орулв, теднәснь орн-нутгин күцәгч йосна болн шаңһа бүрдәцсин 59 баг болна. Тер мет Әрәсән субъектмүдәс 77 баг орлцҗана, орн-нутгин ик муниципальн бүрдәцс 24 баг тогтасн бәәнә.
Ода марһанд орлцачнр алс-зәәһин девсңд белдвр кеҗәнә, терүнә йовудт күн болһн шишлң даалһвр күцәхмн. Эн даалһврин ашар хоршасн балл тоогдад, багмудын то-диг тогтагдад, полуфиналд орлцхнь йилһҗ авгдхмн. Мөрн-хөн сармудт поуфиналын марһан ниигмин сүлҗәнә эв-арһар давулгдхмн. Марһана аш эн җил зунар давулгдхмн гиҗ зуралгдҗана.
ДАВАН Наталья