Әрәсән күндтә донормудыг ачлв

Шидр Элст балһснд олна дөңнлтин штабд олн җилин эргцд эврә сән дурар цусан өгдг улсиг «Әрәсән күндтә донор» гидг өөдән нер зүүснләнь йөрәв. Хальмг Таңһчин эрүл-менд харлһна министр Саран Булат байрин керг-үүлдвриг секәд, донормудт ачлвринь бәрүлҗ өгв.
- Тадн эврә сән дурар цусан өгәд, гемтә болн шав авсн улсин әм аврлһнд ик тәвцән орулҗанат. Җил ирвәс мана таңһчд донормудын то өсәд йовхнь темдгтә. Тана дөңгәр кесг күн цаглань эмнлһ кеҗ, әмд-менд үлдв. Давсн җилд «Цусна төв» гидг бүрдәцин бәәрнд бат ясвр кегдв, ода тенд өдгә цага кергсл болн өлг-эд углҗ тәвгдҗәнә. Удл уга мана донормуд шинрүлгдсн сән таалд цусан өгч чадхмн, - гиҗ министр темдглв.
Эврә сән дурар цусан өгдг улс дунд эрүл-менд харлһна, шаңһа, зөв-йос харлһна бүрдәцсин көдләчнр бәәнә. Давсн җилд мана таңһчд 65 күн «Әрәсән күндтә донор» гидг өөдән нер зүүв. Эдн баһ гиснь дөчн дәкҗ цусан өгсмн. Әрәсән күндтә донормуд җилд нег дәкҗ дөңцл мөңг авна, санаторьт амрх путевкар чеерүд угаһар теткгдх зөвтә, нань чигн онц зөв эднд бәәнә.
БАТАН Сәәхлә