Сәәхн ишкә гермүд

Сегодня, 10:26 | Общество, Таңһчин зәңгс, Зіњг, Сойл

Хальмгт ирсн олн зуульчнр хамгин түрүнд Бурхн Багшин Алтн сүмиг хәләхәр адһна. Давсн җил хурлын өөр хойр цаһан ишкә гер тәвгдсинь әмтн соньмсч хәләнә.

Бәәрн әмтнд чигн тернь соньн болҗ медгдв. Түрүн авгтан хурлд ирсн улс күцәх кергнь олн болад, нүдәрн тер ишкә гермүд хәләчкәд, кергән күцәхәр хурлур адһна. Хөөннь цаг учрсн кемлә әмтн керг кеһәд хурлур ирәд, тер ишкә герт юн бәәхинь медҗ авна. Адһм угаһар ишкә гер болһнд орад, оньган өгч хәләнә.
Ишкә герин негнднь шаҗна үүлдврт кергтә тоот хулдгдна. Энд бурхдын дүртә зургуд, ки-мөрн дарцгуд, номта дегтрмүд, цөгцс, саңгин идә болн нань чигн тоотыг хулдҗ авч болхмн. Эннь нааран өдр болһн ирдг зуульчнрт йир икәр таасгдна. Хальмгт ирҗ үзсн тоотан мартшгоһар, шаҗнла залһлдата зургуд, кегдлмүд эдн дурлҗ хулдҗ авна. Бәәрн әмтн болхла, цөгцс, хальмг лит, дарцгуд, саңгин идәг эндәс даңгин авч һарна.
Талдан ишкә гертнь бурхн-шаҗна тууҗин музей көдлҗәнә. Хальмгт Бурхн Багшин ном яһҗ делгрҗ йовсинь энд тәвгдсн экспонатмуд келҗ өгнә. Музейин көдләчнр стендд орсн тоотын тускар тохнята цәәлһвр өгнә.
Иигәд хойр цаһан ишкә гер хальмгудын урдк нүүдл җирһлинь сергәсн болҗ, хурлын эргндк сәәхн бәәдлд өвәрц нег темдгнь болҗ, әмтнә оньг авлҗана.
ХӨӨЧИН Галина

Видео